ABŞ-də 22 yaşlı tələbə gecə saatlarında səhvən başqa evə yaxınlaşaraq qapını döyüb və hadisə yerinə çağırılan polis tərəfindən güllələnərək öldürülüb.
Qanuntv.az xəbər verir ki, hadisə avqustun 22-də Pensilvaniya ştatının Montqomeri dairəsində, Apper Pottsqrov qəsəbəsində baş verib.
Məlumata görə, 22 yaşlı Qlen Piçer dostunun ad gününü bir qrup şəxslə birlikdə barda qeyd edib. Bar bağlandıqdan sonra dostlar gecəni yaxınlıqdakı fərdi evlərdən birində davam etdirmək qərarına gəliblər. Onlar həmin ünvana ayrı-ayrılıqda getməyə razılaşıblar.
Qlen Piçer isə evə tək piyada gedib. Onun anası Erin Piçerin sözlərinə görə, oğlu qaranlıq və ya spirtli içkinin təsiri səbəbindən ünvanı səhv sala bilər. Ana meşəlik ərazidə yerləşən və bir-birinə bənzəyən iki kottecin səhv salınmış ola biləcəyini ehtimal edib.
Ev sahibləri tanımadıqları şəxsin əraziyə daxil olduğunu gördükdən sonra 911-ə zəng ediblər. Hadisə yerinə gələn polis əməkdaşları Piçeri evin arxa həyətində aşkar ediblər.
Montqomeri dairəsinin prokurorluğunun məlumatına görə, burada qarşıdurma baş verib və Qlen Piçer güllələnərək həyatını itirib.
Mərhumun ailəsi polisin hərəkətlərindən narazıdır. Gəncin anası oğlunun silahsız olduğunu, üzərində yalnız mobil telefon və bel çantasının olduğunu bildirib.
Hazırda ailə hadisənin baş verdiyi ərazidəki qonşu evlərin müşahidə kameralarının görüntülərinin əldə olunmasına çalışır. Hüquq-mühafizə orqanları isə istintaq davam etdiyindən hadisənin təfərrüatları ilə bağlı geniş açıqlama verməyib.
Hadisə ilə bağlı araşdırma davam edir.
