Qarabağda bu dəfə atəş səsləri hərbi təlim ssenariləri üzrə eşidilirdi. Göydə aviasiya vasitələri, yerdə zirehli texnika, müxtəlif istiqamətlərdə hərəkət edən hərbi qulluqçular...
Azərbaycanın işğaldan azad olunmuş ərazilərində ilk dəfə genişmiqyaslı beynəlxalq hərbi təlim keçirilib.
3500-dən çox şəxsi heyətin iştirak etdiyi “Birliyin Gücü-2026” birgə hərbi təlimində Azərbaycan, Türkiyə və Özbəkistan hərbi qulluqçuları iştirak edib. İran, Slovakiya, Qırğızıstan, Tacikistan, Gürcüstan, Pakistan, Türkmənistan, Serbiya və Birləşmiş Ərəb Əmirlikləri isə təlimdə müşahidəçi qismində yer alıblar.
Dörd mərhələdən ibarət təlim zamanı müxtəlif hərbi ssenarilər üzrə əməliyyatlar həyata keçirilib. İlk mərhələdə kiberhəmlələrin aşkarlanması və zərərsizləşdirilməsi, mediada dezinformasiyaya qarşı məlumatlandırma, güc nümayişi və çəkindirmə tədbirləri icra olunub.
İkinci mərhələdə diversiyaya qarşı mübarizə və antiterror tədbirləri, üçüncü mərhələdə isə qanunsuz silahlı qruplaşmaların zərərsizləşdirilməsi ssenariləri həyata keçirilib. Təlim iştirakçı ölkələrin bayraqları ilə birgə keçidlə yekunlaşıb.
Təlim çərçivəsində hərbi əməkdaşlığın inkişafı və birgə fəaliyyət imkanlarının artırılması əsas mövzulardan biri olub.
Azərbaycanın müdafiə naziri Zakir Həsənov təlimlərin şəxsi heyətin peşəkarlığının yüksəldilməsi, qarşılıqlı təcrübə mübadiləsi və sülhün, sabitliyin təmin olunmasına verdiyi töhfələri qeyd edib.
Türkiyənin milli müdafiə naziri Yaşar Güler təlimlərin gələcəkdə digər qardaş ölkələrin iştirakı ilə daha da genişləndirilməsini arzuladığını bildirib.
Özbəkistanın müdafiə naziri general-leytenant Şuxrat Xalmuxamedov isə təlimdə hərbi qulluqçuların yüksək döyüş hazırlığı, peşəkarlıq, nizam-intizam, çeviklik və müasir silah və texnikadan istifadə bacarıqlarını nümayiş etdirdiklərini vurğulayıb.
Hərbi ekspert Elxan Şıxəliyev bildirib ki, “Birliyin Gücü-2026” təliminin əsas məqsədlərindən biri birgə əməliyyatlara hazırlıq, qoşunların koordinasiyası və prosedurların standartlaşdırılmasıdır.
Ekspertin sözlərinə görə, təlimin daha geniş siyasi-hərbi tərəfi də var. Azərbaycan regional əməkdaşlığı yalnız siyasi bəyanatlar səviyyəsində deyil, real hərbi qarşılıqlı fəaliyyət, hərbi-texniki əməkdaşlıq, müdafiə sənayesi və texnologiya mübadiləsi istiqamətində də inkişaf etdirir.
Ehtiyatda olan türkiyəli general-mayor Yücel Karauz isə “Birliyin Gücü-2026” təlimində Özbəkistanın iştirakını Azərbaycan və Türkiyə arasında uzun illərdir davam edən hərbi əməkdaşlığın Türk Dövlətləri Təşkilatının digər üzvlərinin iştirakı ilə genişlənməsi kontekstində qiymətləndirib.
Onun sözlərinə görə, təlimdə ortaq təhdidlər, birgə komanda-idarəetmə fəaliyyəti, süni intellekt, kibertəhdidlər və hibrid müharibənin tələbləri üzrə müxtəlif ssenarilər bir arada tətbiq olunub.
Təlimlə paralel olaraq Bakıda “ADEX 2026” VI Azərbaycan Beynəlxalq Müdafiə Sərgisi və “Securex Caspian” XV yubiley Beynəlxalq Daxili Təhlükəsizlik, Mühafizə və Xilasetmə Avadanlıqları Sərgisi keçirilib.
Beləliklə, ölkənin bir tərəfində Azərbaycan, Türkiyə və Özbəkistan hərbçiləri müxtəlif əməliyyat ssenarilərini icra etdiyi halda, Bakıda müdafiə sənayesinin müasir texnoloji imkanları nümayiş etdirilib.
“ADEX 2026” çərçivəsində Azərbaycan və Türkiyənin müdafiə sənayesi şirkətləri arasında əməkdaşlığa dair müqavilələr imzalanıb. Həmçinin Azərbaycan və Özbəkistan müdafiə nazirlikləri arasında 2027-ci il üçün ikitərəfli hərbi əməkdaşlıq planı imzalanıb.
Elxan Şıxəliyev bu iki tədbirin bir-birini tamamlayan istiqamətlər olduğunu bildirib. Onun sözlərinə görə, “Birliyin Gücü-2026” hərbi-siyasi və əməliyyat səviyyəsində əməkdaşlığı, “ADEX 2026” isə həmin əməkdaşlığın texnoloji və hərbi-sənaye bazasını nümayiş etdirir.
Yücel Karauz isə sərgidə Azərbaycanın lazer silah sistemləri, pilotsuz yerüstü avtonom vasitələri, kamikadze yerüstü vasitələri, dron sistemləri və digər müasir silah-sursat nümunələrinin nümayiş etdirilməsini diqqətçəkən məqam kimi qeyd edib.
Rəqəmlər də tədbirlərin miqyasını göstərir.
“Birliyin Gücü-2026” birgə hərbi təlimində 135 pilotsuz vasitə, 76 zirehli texnika, 94 artilleriya sistemi, 27 aviasiya vasitəsi, 34 REM/REK/RL sistemi, 18 hava hücumundan müdafiə vasitəsi, 8 dəst mühəndis texnikası və 25 dəniz vasitəsi nümayiş olunub.
“ADEX 2026” və “Securex Caspian” sərgilərində isə ümumilikdə 53 ölkə təmsil olunub, 30 ölkədən 280 şirkət və təşkilat iştirak edib.
Beləliklə, “Birliyin Gücü-2026” təlimi ilə “ADEX 2026” sərgisinin eyni dövrə təsadüf etməsi hərbi hazırlıq, birgə əməliyyat imkanları, müdafiə sənayesi və hərbi-texniki əməkdaşlığın paralel istiqamətlərdə nümayiş etdirilməsi ilə yadda qalıb.
Qanuntv.az
