
Türkiyənin müdafiə sənayesi sahəsində həyata keçirdiyi layihələrdən biri olan “Kızılelma” pilotsuz döyüş təyyarəsi yeni mərhələyə qədəm qoyub. “Baykar” şirkəti tərəfindən istehsal edilən Türkiyənin ilk pilotsuz döyüş təyyarəsi qəbul sınaqlarını uğurla başa vurduqdan sonra təhlükəsizlik qüvvələrinə təhvil verilib.
İlkin mərhələdə üç ədəd “Kızılelma” pilotsuz döyüş təyyarəsinin təhvil verilməsi nəzərdə tutulub. Bu hadisə pilotsuz aviasiya sistemlərinin inkişafı baxımından mühüm yenilik kimi qiymətləndirilir.
Məlumata görə, bu təhvil prosesi ilə dünya aviasiya tarixində ilk dəfə pilotsuz döyüş təyyarəsi əməliyyat məqsədilə silahlanmaya daxil edilib.
“Kızılelma” layihəsi Türkiyənin yerli və milli müdafiə sənayesinin inkişafı istiqamətində həyata keçirdiyi texnoloji təşəbbüslərdən biridir. Layihənin reallaşdırılması ölkənin pilotsuz aviasiya sahəsindəki imkanlarının genişləndirilməsi baxımından diqqət çəkir.
Təyyarələrin təhlükəsizlik qüvvələrinə təhvil verilməsi Türkiyənin hərbi aviasiya sahəsində yeni mərhələyə keçidinin göstəricilərindən biri hesab olunur.




