
“İnter Mayami” klubunun hücumçusu Luis Suares 2017-ci ildə Lionel Messi ilə birlikdə Neymarı “Barselona”dan ayrılmaq fikrindən daşındırmağa çalışdıqlarını açıqlayıb.
QanunTV.az xəbər verir ki, uruqvaylı futbolçu bu barədə “Catalunya Radio”ya müsahibəsində danışıb.
Suares bildirib ki, 2017-ci ilin yayında Neymarı “Barselona”da qalmağa razı salmaq mümkün olmayıb. Onun sözlərinə görə, həm özü, həm də Lionel Messi braziliyalı futbolçunun PSJ-yə keçməsinin qarşısını almaq üçün əllərindən gələni ediblər.
Uruqvaylı hücumçu “Barselona”da Messi və Neymarla birlikdə çıxış etdiyi dövrü də xatırlayıb. O, üç futbolçu arasında heç bir eqoizmin olmadığını, bir-birlərinin uğurlarına sevindiklərini və daim komanda yoldaşlarına dəstək göstərdiklərini vurğulayıb.
Suares qeyd edib ki, hətta “Qızıl buts” uğrunda mübarizə apardığı mövsümdə Messi və Neymar penaltiləri onun yerinə yetirməsini təklif ediblər. Futbolçu bunu əsl komanda ruhunun göstəricisi kimi qiymətləndirib.
Qeyd edək ki, Neymar 2017-ci ilin avqustunda 222 milyon avro qarşılığında “Barselona”dan PSJ-yə transfer olunub. Bu keçid futbol tarixinin rekord transferi kimi qeydə alınıb.





