ABŞ-nin “İnter Mayami” klubunun sahibi Xorxe Mas komandanın gələcəkdə Cənubi Amerika Futbol Konfederasiyasının (CONMEBOL) təşkil etdiyi Libertadores Kubokunda iştirakını planlaşdırdıqlarını açıqlayıb.
QanunTV.az xəbər verir ki, Xorxe Mas bu barədə mətbuata verdiyi açıqlamada danışıb. Klub rəhbəri bildirib ki, “İnter Mayami”nin iddiaları yalnız MLS ilə məhdudlaşmır və komanda beynəlxalq arenada, xüsusilə də Cənubi Amerikanın ən nüfuzlu klub turniri sayılan Libertadores Kubokunda mübarizə aparmaq istəyir.
Masın sözlərinə görə, bu planın reallaşması üçün hüquqi və təşkilati məsələlər mövcuddur, lakin klub rəhbərliyi belə bir iştirakın həm “İnter Mayami”, həm də turnir üçün böyük maraq yaradacağını düşünür.
Qeyd edək ki, Libertadores Kuboku Cənubi Amerikanın ən güclü klublarını bir araya gətirən və dünya futbolunda yüksək nüfuza malik turnirlərdən biri hesab olunur. ABŞ klubunun bu yarışda iştirakı futbol ictimaiyyətində böyük marağa səbəb ola bilər.