
Noyabrın 19-da elm və təhsil naziri Emin Əmrullayev Bakı Dövlət Universitetinin (BDU) yeni rektoru Məleykə Abbaszadəni universitetin professor-müəllim heyətinə və kollektivinə təqdim edib.
Təqdimat mərasimində universitetin yeni rəhbərliyinin fəaliyyət istiqamətləri, ali təhsil müəssisəsinin qarşısında duran əsas vəzifələr və təhsil sahəsində qarşıya qoyulan hədəflər diqqət mərkəzində olub.
Bakı Dövlət Universiteti Azərbaycanın ali təhsil sistemində xüsusi yeri və zəngin tarixi ənənələri ilə seçilən elm və təhsil ocaqlarından biridir. Universitet uzun illər ərzində ölkənin elmi-pedaqoji potensialının formalaşmasına, yüksək ixtisaslı mütəxəssislərin yetişdirilməsinə və elmin müxtəlif istiqamətlərinin inkişafına mühüm töhfələr verib.
Məleykə Abbaszadənin rektor vəzifəsinə təqdim olunması universitetin gələcək inkişafı, idarəetmə sisteminin təkmilləşdirilməsi, elmi fəaliyyətin genişləndirilməsi və tədrisin keyfiyyətinin daha da yüksəldilməsi baxımından diqqət çəkən hadisədir.
Qeyd edək ki, BDU ölkəmizin elm və təhsil tarixində mühüm missiya daşıyan ali təhsil müəssisəsi kimi öz ənənələrini qorumaqla yanaşı, müasir dövrün tələblərinə uyğun inkişafını davam etdirir.




