
Payız-qış mövsümünün gəlişi ilə respirator infeksiyaların yayılması sürətlənib. Son günlər ailələrdə, iş kollektivlərində və ictimai məkanlarda bir neçə nəfərin eyni vaxtda xəstələnməsi halları daha çox müşahidə olunur. Mütəxəssislər bu vəziyyətdə fərdi gigiyena qaydalarına əməl etməyin və xəstəlik zamanı ətrafdakı insanları qorumağın vacibliyini vurğulayırlar.
Professor Adil Qeybulla mövzu ilə bağlı Oxu.Az-a açıqlamasında bildirib ki, koronavirus tamamilə aradan qalxmayıb, qrip virusu isə hər il mutasiyaya uğrayaraq yeni formalarla qarşımıza çıxır.
Professorun sözlərinə görə, hazırda adenovirus, rinovirus, koronavirus və digər respirator infeksiyalar həm Avropada, həm də Azərbaycanda yayılmaqdadır. O, gələcəkdə ciddi qrip pandemiyasının baş verməsi ehtimalının da nəzərə alınmalı olduğunu qeyd edib.
Adil Qeybulla virusların sürətlə yayılmasının əsas səbəblərindən birinin insanların xəstə olduqları halda lazımi ehtiyat tədbirlərinə əməl etməməsi olduğunu bildirib. Onun sözlərinə görə, öskürən və asqıran şəxslərin maskadan istifadə etməməsi, xəstə vəziyyətdə işə və ictimai məkanlara getməsi infeksiyanın digər insanlara ötürülməsinə şərait yaradır.
Professor xüsusilə ailə üzvlərinin və iş kollektivlərinin bu baxımdan risk altında olduğunu diqqətə çatdırıb. Bir nəfərin yoluxması nəticəsində infeksiyanın qısa müddətdə ətrafındakı insanlara keçə biləcəyini vurğulayıb.
O, Yaponiyanı nümunə göstərərək qeyd edib ki, həmin ölkədə insanlar xəstə olduqları zaman maska taxmaqla həm özlərini, həm də ətrafdakıları qorumağa çalışırlar.
Adil Qeybulla hazırda yayılan infeksiyalar arasında adenovirusun üstünlük təşkil edə biləcəyini ehtimal etsə də, koronavirusun da dövriyyədə qaldığını bildirib. O, pandemiya dövründən lazımi nəticələrin çıxarılmasının vacibliyini vurğulayıb.
Professor sağlamlığın qorunması üçün fiziki aktivliyin artırılmasını, normal və balanslı qidalanmanı, sağlam həyat tərzinə üstünlük verilməsini tövsiyə edib. Xüsusilə gənclər arasında geniş yayılan energetik içkilər və fastfud qidalarının həddindən artıq istehlakına diqqət çəkib.
Mütəxəssislərin tövsiyələrinə əsasən, respirator infeksiyalardan qorunmaq üçün xəstəlik əlamətləri olduqda evdə qalmaq, zəruri hallarda maskadan istifadə etmək, otaqları mütəmadi havalandırmaq və gigiyena qaydalarına əməl etmək mühüm əhəmiyyət daşıyır.
Qeyd edək ki, payız-qış mövsümündə respirator infeksiyaların yayılma riskinin artması insanların daha diqqətli və məsuliyyətli davranmasını zəruri edir.





