Dünya Daun Sindromu Günü ərəfəsində Daş Salnamə Muzeyində “Çərçivədən kənar” adlı inklüziv incəsənət sərgisi təqdim edilib.
Qanuntv.az xəbər verir ki, tədbirdə Anar Ələkbərov, Alyona Əliyeva, Səbinə Əliyeva, Milli Məclisin deputatları, mədəniyyət və incəsənət nümayəndələri iştirak ediblər.
Sərgi SOCAR Midstream Gas Operations-un təşəbbüsü və dəstəyi, DADDI sosial sahibkarlıq müəssisəsinin təşkilatçılığı, bp, PAŞA Holdinq, Heydər Əliyev Fondunun Regional İnkişaf İctimai Birliyi, YARAT Müasir İncəsənət Mərkəzi və Daun Sindromlu Şəxslərin Reabilitasiya Mərkəzinin tərəfdaşlığı ilə baş tutub.
Tədbirdə çıxış edənlər daun sindromlu şəxslərin cəmiyyətə inteqrasiyasının əhəmiyyətini, onların yaradıcılıq potensialının dəstəklənməsini və qurumlararası əməkdaşlığın rolunu vurğulayıblar. Sərginin məqsədi inklüzivliyi və sosial həmrəyliyi təşviq etmək, daun sindromlu şəxslərin yaradıcılıq imkanlarını geniş ictimaiyyətə nümayiş etdirməkdir.
Tədbir çərçivəsində müəlliflərin rəsm əsərlərindən ibarət satış-sərgi təşkil olunub və satışdan əldə olunan vəsait tam şəkildə müəlliflərə təqdim edilib. Bədii proqramda gənc ifaçı Əmrah Musayev və daun sindromlu şəxslərin birgə ifasında sərgi üçün bəstələnmiş mahnı, həmçinin rəqs və musiqi nömrələri təqdim olunub.
Sərgidə nümayiş olunan əsərlər YARAT Müasir İncəsənət Mərkəzində keçirilmiş iki günlük yaradıcılıq master-klassları zamanı hazırlanıb.
