Sentyabrın 27-də Azərbaycanda 27 Sentyabr – Anım Günü qeyd olunur. Bu əlamətdar gündə Azərbaycan Respublikasının Prezidenti İlham Əliyev və birinci xanım Mehriban Əliyeva Bakıdakı Zəfər parkını ziyarət ediblər.
Qanuntv.az xəbər verir ki, dövlət başçısı Zəfər abidəsinin önünə əklil qoyaraq Vətən müharibəsində və Azərbaycanın ərazi bütövlüyü uğrunda canından keçmiş şəhidlərin xatirəsini ehtiramla yad edib.
Daha sonra birinci xanım Mehriban Əliyeva şəhidlərimizin əziz xatirəsini dərin hörmət və ehtiramla anıb.
Anım Günü Azərbaycan xalqının Vətən müharibəsində şəhid olan qəhrəman övladlarının xatirəsinə ehtiramının ifadəsidir. Hər il sentyabrın 27-də ölkə ərazisində və dünyanın müxtəlif yerlərində yaşayan azərbaycanlılar şəhidlərin müqəddəs xatirəsini yad edirlər.
Zəfər parkı isə Azərbaycanın ərazi bütövlüyünün və Vətən müharibəsində qazanılmış tarixi Zəfərin rəmzlərindən biri kimi xüsusi mənəvi əhəmiyyət daşıyır.
