Sentyabrın 24-də Azərbaycan Respublikasının Nazirlər Kabinetində Baş nazir Əli Əsədovun rəhbərliyi ilə 2027-ci il üzrə dövlət və icmal büdcə layihələri, eləcə də növbəti üç il üçün büdcə və sosial-iqtisadi inkişaf göstəricilərinin müzakirəsinə həsr olunmuş geniş iclas keçirilib.
Qanuntv.az xəbər verir ki, iclasda 2027-ci il və sonrakı üç il üzrə iqtisadi və sosial inkişaf konsepsiyası, proqnoz göstəriciləri, həmçinin dövlət büdcəsinin əsas gəlir və xərc istiqamətləri müzakirə olunub.
Baş nazir Əli Əsədov bildirib ki, 2027–2030-cu illərdə dövlət büdcəsi xərclərinin əsas prioritetləri dayanıqlı iqtisadi artımın dəstəklənməsi, işğaldan azad edilmiş ərazilərin bərpası və məskunlaşdırılması, müdafiə və milli təhlükəsizliyin gücləndirilməsi, sosial müdafiənin davam etdirilməsi, rəqəmsal inkişaf və süni intellektin tətbiqi, təhsil, səhiyyə və “yaşıl artım”ın dəstəklənməsi olacaq.
Məlumata görə, 2027-ci ildə dövlət büdcəsinin gəlirlərinin 39 milyard 234 milyon manat, xərclərinin isə 42 milyard 400 milyon manat olacağı proqnozlaşdırılır. Dövlət büdcəsi kəsirinin 3 milyard 166 milyon manat və ya ÜDM-in 2,2 faizi səviyyəsində olması gözlənilir.
2027-ci ildə Ümumi Daxili Məhsulun 2,7 faiz artaraq 141 milyard manata çatacağı, qeyri-neft sektorunda isə real artım tempinin 4,4 faiz təşkil edəcəyi proqnozlaşdırılır.
Növbəti ilin büdcəsində sosialyönlü xərclərin ümumi xərclərdə payının 44 faiz olması nəzərdə tutulur. Müdafiə və milli təhlükəsizlik xərcləri isə 8,8 milyard manat təşkil edəcək ki, bu da dövlət büdcəsi xərclərinin 21 faizinə bərabərdir.
İşğaldan azad edilmiş ərazilərin yenidən qurulması və bərpası da əsas prioritetlər sırasında saxlanılır. 2027-ci ildə bu məqsədlər üçün 3,4 milyard manat vəsaitin ayrılması nəzərdə tutulur. 2020–2026-cı illər ərzində isə həmin ərazilərin bərpası üçün dövlət büdcəsindən ümumilikdə 25 milyard manatdan çox vəsait ayrıldığı bildirilib.
Nazirlər Kabinetində qeyd olunub ki, 2027–2030-cu illər üzrə iqtisadi proqnozlarda neftin baza qiyməti bir barel üçün 65 ABŞ dolları götürülüb. 2027-ci ildə orta illik inflyasiyanın 5,3 faiz səviyyəsində olacağı proqnozlaşdırılır.
Bildirilib ki, ölkənin strateji valyuta ehtiyatları hazırda təxminən 91 milyard ABŞ dolları təşkil edir. Xarici dövlət borcunun isə sentyabrın 1-nə 4,5 milyard ABŞ dolları olduğu və proqnozlaşdırılan ÜDM-in 5,6 faizinə bərabər olduğu açıqlanıb.
İclasda 2027–2030-cu illəri əhatə edən yeni Strategiyanın və Böyük Qayıdışa dair II Dövlət Proqramının layihələrinin də hazırlandığı bildirilib.
Nazirlər Kabinetində aparılan müzakirələrin nəticələri əsasında 2027-ci il üzrə dövlət və icmal büdcə layihələrinin, eləcə də növbəti üç il üçün müvafiq proqnozların qanunvericiliyə uyğun olaraq təqdim edilməsi nəzərdə tutulur.
