Türkiyənin “Canik” müdafiə sənayesi şirkəti Azərbaycan Hərbi-Hava Qüvvələrinin Mi-17 helikopterləri üçün yeni silah inteqrasiyası həyata keçirib.
Qanuntv.az xəbər verir ki, bu barədə “Haber Global” məlumat yayıb.
Şirkət 12,7×99 millimetrlik M3 ağır pulemyotunun helikopterlərdə istifadəsi üçün hazırladığı FALCON FLEX 50 sistemi ilə silah-platforma inteqrasiyası imkanlarını genişləndirir.
Məlumata görə, Azərbaycan Hərbi-Hava Qüvvələrinin Mi-17 helikopterləri üçün M3 FALCON pulemyotu və hava vasitələri üçün hazırlanmış FALCON FLEX 50 dayağının inteqrasiyası üzrə işlər aparılıb.
Layihə çərçivəsində əvvəlcə Türkiyənin inventarında olan Mi-17 helikopteri texniki baxımdan araşdırılıb, daha sonra Azərbaycanda ilkin inteqrasiya və texniki işlər həyata keçirilib.
İnteqrasiya layihəsi başa çatdıqdan sonra ilk prototiplərin sınaqları Türkiyənin Samsun şəhərində yerləşən müəssisədə simulyasiya edilib. Növbəti mərhələdə isə Azərbaycanda uçuşa yararlılıq və atış sınaqları keçirilib.
Şirkətin məlumatına görə, sistemlərin cari il ərzində Azərbaycan Hərbi-Hava Qüvvələrinə təhvil verilməsi planlaşdırılır.
FALCON FLEX 50 müxtəlif hava platformalarının qapı, pəncərə və rampa hissələrinə uyğunlaşdırıla bilən modul silah dayağı kimi təqdim olunur.
Layihənin həyata keçirilməsi Azərbaycan-Türkiyə müdafiə sənayesi əməkdaşlığı çərçivəsində aviasiya platformalarının mövcud imkanlarının genişləndirilməsi istiqamətində atılan addımlardan biri kimi qiymətləndirilir.
