Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyeva Qəbələ rayonunun Çuxur-Qəbələ kəndində yerləşən Qəbələ Arxeoloji Mərkəzinin parkında təşkil olunan sərginin açılış mərasimində iştirak edib.
Qanuntv.az xəbər verir ki, sərgidə Qəbələnin Vəndam qəsəbəsindən olan rəssam Yəhya Cəlilovun ilk fərdi sərgisi təqdim olunub. Ekspozisiyada müəllifin müxtəlif mövzuları əhatə edən ümumilikdə 38 rəsm əsəri nümayiş etdirilib.
Tədbir iştirakçıları rəssamın yaradıcılığı ilə yaxından tanış olub, sərgilənən əsərlər böyük maraqla qarşılanıb. Sərgi gənc və istedadlı sənətkarların yaradıcılığının təşviqi, milli mədəniyyətin təbliği baxımından əhəmiyyətli platforma kimi qiymətləndirilib.
Daha sonra Qəbələ Arxeoloji Mərkəzinin yaxınlığında yerləşən park ərazisində IDEA İctimai Birliyinin təşəbbüsü ilə ağacəkmə aksiyası keçirilib. Ekoloji mühitin qorunmasına və yaşıllıqların artırılmasına xidmət edən aksiyada Bakı və Qəbələdən olmaqla ümumilikdə 32 uşaq iştirak edib.
Tədbir çərçivəsində uşaqlar tərəfindən müxtəlif növ ağac tingləri əkilərək ətraf mühitin mühafizəsinə töhfə verilib. Həm mədəniyyətin, həm də ekologiyanın təşviqinə yönəlmiş təşəbbüs iştirakçılar tərəfindən yüksək qiymətləndirilib.
