Azərbaycan və Ermənistan xarici işlər nazirləri arasında yaxın zamanlarda növbəti ikitərəfli görüş keçirilə bilər.
Xarici işlər naziri Ceyhun Bayramov jurnalistlərə açıqlamasında bildirib ki, Azərbaycan Ermənistan Xarici İşlər Nazirliyi ilə mütəmadi əlaqələr saxlayır və tərəflər arasında görüşlərin keçirilməsi istisna deyil.
Nazirin sözlərinə görə, Ermənistanın xarici işlər naziri Ararat Mirzoyanla növbəti fürsətdə ikitərəfli görüş keçirilməsi barədə razılıq əldə olunub.
Ceyhun Bayramov qeyd edib ki, sonuncu dəfə “ŞƏT plyus” formatında Bişkekdə Prezident İlham Əliyevin iştirakı ilə çoxsaylı görüşlər keçirilib. Həmin tədbirlər çərçivəsində Ermənistanın baş naziri ilə də görüşlər baş tutub.
“Orada bizim belə tam formatlı görüşümüz olmasa da, Ararat Mirzoyanla həmin ərəfədə bir sıra məsələlər üzərində fikir mübadiləsi aparmaq imkanına malik olduq və orada da razılıq əldə etdik ki, növbəti fürsətlərdə biz ikitərəfli görüş keçirib bir sıra məsələləri müzakirə edəcəyik”, – deyə nazir bildirib.
Ceyhun Bayramov yaxın zamanlarda Azərbaycan və Ermənistan xarici işlər nazirləri arasında belə bir görüşün baş tuta biləcəyini vurğulayıb.
Qanuntv.az
