Azərbaycanda PISA 2025 nəticələrinə əsasən, cinslərarası ən böyük fərq oxu savadlılığı üzrə qızların xeyrinə qeydə alınıb.
Qanuntv.az xəbər verir ki, bu barədə PISA 2025 – Şagird Qiymətləndirilməsi üzrə Beynəlxalq Proqramın nəticələrinin təqdimatına həsr olunan tədbirdə məlumat verilib.
Bildirilib ki, Azərbaycanda qızların nəticələri təbiət elmləri və oxu savadlılığı üzrə oğlanlardan yüksək, riyazi savadlılıq üzrə isə demək olar ki, eyni olub.
Təbiət elmləri üzrə qızlar 416, oğlanlar isə 402 bal toplayıb. Beləliklə, qızlar oğlanları 13,6 bal qabaqlayıb. İƏİT ölkələrində isə bu istiqamətdə fərq 1,2 bal olmaqla oğlanların xeyrinə olub.
Oxu savadlılığı üzrə Azərbaycanda qızlar 392, oğlanlar isə 356 bal toplayıb. 36 ballıq fərq qızların xeyrinə qeydə alınıb. İƏİT ölkələrində də qızlar üstün nəticə göstərib və fərq 29,6 bal təşkil edib.
Riyazi savadlılıq üzrə isə nəticələr demək olar ki, eyni olub. Azərbaycanda qızlar 423, oğlanlar 422 bal toplayıb. Cinslərarası fərq 0,8 bal olmaqla qızların xeyrinə olub. İƏİT ölkələrində isə riyazi savadlılıq üzrə oğlanlar qızları 13,1 bal qabaqlayıb.
Tədbirdə qeyd olunub ki, Azərbaycanda qızların oxu savadlılığı üzrə nəticələri oğlanlardan yüksək olsa da, onların göstəricisi də baza səviyyəsindən aşağıdır.
Bu nəticə şagirdlərin oxu savadlılığının inkişafına xüsusi diqqət yetirilməsinin vacibliyini göstərir.
