Abşeron rayonunda keçmiş həyat yoldaşına məxsus avtomobili yandıran 46 yaşlı Səfa Seyidovaya (ad şərtidir) hökm oxunub.
Qanuntv.az xəbər verir ki, Abşeron Rayon Məhkəməsinin hökmü ilə Səfa Seyidova Cinayət Məcəlləsinin 186.2.2-ci maddəsi (əmlakı qəsdən məhv etmə) ilə təqsirli bilinib.
İttihama əsasən, əvvəllər narkotiklərlə bağlı cinayətə görə məhkum olunan Səfa Seyidova sintetik tiner məhlulu əldə edib. O, 12 il əvvəl boşandığı keçmiş həyat yoldaşına məxsus avtomobilin yanına gələrək məhlulu 32 min manat dəyərində olan “KIA Sorento”nun üzərinə töküb və avtomobili yandırıb.
Hadisə Bakı-Şamaxı avtomobil yolunun Abşeron rayonu, 28 May qəsəbəsindən keçən hissəsində baş verib. Yanğın nəticəsində avtomobilə 6 470 manat məbləğində ziyan dəyib.
Məhkəmə zamanı zərərçəkmiş qadın bildirib ki, keçmiş həyat yoldaşı ondan mütəmadi olaraq pul tələb edib. Onun sözlərinə görə, hadisə günü də Səfa Seyidova zəng edərək pul istəyib. Pul verməkdən imtina etdikdə isə keçmiş həyat yoldaşı avtomobili yandıracağı ilə hədələyib.
Qadın qorxduğu üçün avtomobili yol kənarında mühafizə olunan ərazidə saxlayıb. Lakin həmin gün gecə saatlarında ona avtomobilinin yandığı barədə məlumat verilib.
Məhkəmənin hökmü ilə Səfa Seyidovaya 3 il 8 ay müddətinə azadlıqdan məhrumetmə cəzası təyin olunub. O, cəzasını ciddi rejimli cəzaçəkmə müəssisəsində çəkəcək.
