ABŞ BMT Baş Assambleyasında Yer kürəsinin xəritələrdə daha real ölçülərlə təsvir edilməsini nəzərdə tutan “Equal Earth” xəritə proyeksiyasını dəstəkləyən qətnamə layihəsinin əleyhinə səs verən yeganə ölkə olub.
Qanuntv.az xəbər verir ki, bu barədə TASS məlumat yayıb.
Səsvermə zamanı sənədin lehinə 164 dövlət səs verib. Ukrayna, Moldova, Gürcüstan, Serbiya, Litva və Estoniya isə bitərəf qalıb.
Səsvermədən əvvəl ABŞ-nin BMT-dəki nümayəndəsi sənədin rədd edilməsinə çağırıb. Vaşinqton bu təşəbbüsü xəritələrdəki təhriflərin aradan qaldırılmasına yönəlmiş neytral addım kimi deyil, daha geniş ideoloji gündəliyin bir hissəsi kimi qiymətləndirib.
ABŞ tərəfi həmçinin belə qətnamələrin BMT-nin diqqətini beynəlxalq sülh, rifah və dövlətlərarası münasibətlər kimi əsas məsələlərdən yayındıra biləcəyini bildirib.
Qeyd edək ki, təklif Afrika İttifaqına üzv olan 54 ölkənin dəstəyi ilə gündəmə gətirilib. “Equal Earth” proyeksiyası xüsusilə Afrika qitəsinin xəritədə ölçü baxımından daha düzgün təsvir edilməsini nəzərdə tutur.
BMT Baş Assambleyasının qətnamələri hüquqi baxımdan məcburi xarakter daşımır. Bununla belə, belə qərarlar tədris proqramlarında və xəritəçəkmə sahəsində istifadə olunan texnologiyalarda dəyişikliklərə zəmin yarada bilər.
