Bakıda, Heydər Əliyev Mərkəzində Yeni Azərbaycan Partiyasının (YAP) VIII Qurultayı keçirilib.
Qanuntv.az xəbər verir ki, Azərbaycan Respublikasının Prezidenti, Yeni Azərbaycan Partiyasının Sədri İlham Əliyev qurultayda çıxış edərək Azərbaycanın qarşıdakı dövr üçün əsas siyasi, hərbi, təhlükəsizlik, iqtisadi, enerji və sosial inkişaf prioritetlərindən danışıb.
Dövlət başçısı bildirib ki, YAP-ın VIII Qurultayı Azərbaycanın ərazi bütövlüyünü və suverenliyini tam bərpa etməsindən sonra keçirilən ilk qurultaydır.
Prezident çıxışında qarşıdakı dövrdə hərbi gücün artırılması, ideoloji təhlükəsizliyin təmin olunması, müstəqil xarici siyasətin davam etdirilməsi, iqtisadi inkişaf, enerji və nəqliyyat imkanlarının genişləndirilməsi, eləcə də Qarabağ və Şərqi Zəngəzurda bərpa-quruculuq işlərinin davam etdirilməsinin əsas istiqamətlər sırasında olduğunu bildirib.
İlham Əliyev YAP-ın fəaliyyəti və regiondakı siyasi rolu barədə də danışıb.
“Yeni Azərbaycan Partiyası nəinki Azərbaycanın, Cənubi Qafqazın ən böyük siyasi qüvvəsidir”, - deyə Prezident bildirib.
Dövlət başçısı qeyd edib ki, YAP müxalifət partiyası kimi yaransa da, artıq 30 ildən çoxdur hakimiyyətdədir.
Prezident YAP-ın VIII Qurultayının Azərbaycanın yeni ictimai-siyasi və geosiyasi reallıqları şəraitində keçirildiyini vurğulayıb.
“İlk dəfədir ki, qurultayımız Azərbaycan öz ərazi bütövlüyünü və suverenliyini tam bərpa edəndən sonra keçirilir”, - deyə İlham Əliyev bildirib.
Onun sözlərinə görə, 2020-ci il Vətən müharibəsindən sonra Azərbaycanın əsas məqsədlərindən biri ərazi bütövlüyünün tam bərpası olub. Prezident qeyd edib ki, siyasi, diplomatik və hərbi istiqamətlərdə aparılan fəaliyyət nəticəsində 2023-cü il sentyabrın 20-də Azərbaycanın Qarabağ üzərində tam nəzarəti bərpa olunub.
İlham Əliyev çıxışında Heydər Əliyevin siyasi irsindən də danışıb. O bildirib ki, illər keçdikcə taktiki və müəyyən strateji məqsədlər dəyişə bilsə də, əsas siyasi xətt dəyişməz olaraq qalır.
Prezident həmin xətti müstəqillik, dövlətçilik, iqtisadi müstəqillik və güclü hərbi potensial kimi xarakterizə edib.
İlham Əliyev Azərbaycanın beynəlxalq mövqeyinə də toxunaraq ölkənin iqtisadi müstəqilliyinin təmin olunduğunu və beynəlxalq müstəvidə fəal siyasət apardığını bildirib.
Qarşıdakı dövr üçün əsas vəzifələrdən birinin hərbi gücün artırılması olduğunu deyən Prezident Azərbaycanın hərbi və təhlükəsizlik imkanlarının daim yüksək səviyyədə saxlanılmasının vacibliyini vurğulayıb. O bildirib ki, gələn ilin dövlət büdcəsində hərbi və təhlükəsizlik məsələləri üçün təqribən 9 milyard manata yaxın vəsait nəzərdə tutulur.
Xarici siyasətlə bağlı danışan dövlət başçısı Azərbaycanın müstəqil siyasət kursunu davam etdirəcəyini bildirib.
“Xarici siyasəti biz elə qururuq və bundan sonra da qurmalıyıq ki, heç kim bizim işimizə müdaxilə etməsin”, - deyə İlham Əliyev vurğulayıb.
Prezident həmçinin müasir dövrdə ideoloji təhlükəsizliyin əhəmiyyətindən danışıb. Onun sözlərinə görə, internet, kiberhücumlar və süni intellektin geniş yayıldığı bir dövrdə ideoloji risklər də yeni xarakter alır.
İlham Əliyev təhsilin bu istiqamətdə əsas vasitələrdən biri olduğunu bildirərək müasir ideoloji işlərin aparılmasının vacibliyini qeyd edib.
Prezident İslam həmrəyliyinin gücləndirilməsi məsələsinə də toxunub. O bildirib ki, Azərbaycan bu istiqamətdə səylər göstərir və İslam Əməkdaşlıq Təşkilatı ilə sıx əlaqələr saxlayır. Dövlət başçısı gələn il Azərbaycanda İslam Əməkdaşlıq Təşkilatının Zirvə Görüşünün keçirilməsinin nəzərdə tutulduğunu da açıqlayıb.
Çıxışda Azərbaycanın enerji potensialı da diqqət mərkəzində olub. Prezident bildirib ki, Azərbaycan xam neft, neft məhsulları, təbii qaz, elektrik enerjisi, neft-kimya məhsulları və gübrə istehsal və ixrac edir.
İlham Əliyev enerji təhlükəsizliyinin milli təhlükəsizliyin mühüm tərkib hissəsi olduğunu qeyd edib və Azərbaycanın bu sahədə rolunun gələcəkdə daha da artacağını bildirib.
Qarabağ və Şərqi Zəngəzurda aparılan bərpa-quruculuq işlərindən danışan Prezident hazırda həmin ərazilərdə 96 min insanın yaşadığını, işlədiyini və təhsil aldığını bildirib.
Onun sözlərinə görə, bölgələrin inkişafına indiyədək 28 milyard manat vəsait ayrılıb, 48 yaşayış məntəqəsində keçmiş məcburi köçkünlərin məskunlaşması təmin olunub.
“Bundan sonrakı illərdə Böyük Qayıdış daha da sürətlə gedəcək”, - deyə dövlət başçısı bildirib.
Prezident çıxışında iqtisadi və sosial məsələlərə də toxunaraq gələn il minimum əməkhaqqının, pensiyaların və sosial müavinətlərin artırılacağını açıqlayıb.
İlham Əliyev Azərbaycanın tranzit imkanlarının genişləndirilməsi ilə bağlı da hədəfləri açıqlayıb. O bildirib ki, Azərbaycan ərazisindən keçən tranzit yüklərin həcminin orta müddətdə 30 milyon tona çatdırılması qarşıya məqsəd qoyulub. Hazırda gözlənilən illik tranzit yük həcminin 16 milyon ton olduğu qeyd edilib.
Beləliklə, YAP-ın VIII Qurultayında Prezident İlham Əliyevin çıxışında hərbi və təhlükəsizlik məsələləri, ideoloji siyasət, müstəqil xarici siyasət, İslam həmrəyliyi, enerji və nəqliyyat imkanlarının genişləndirilməsi, iqtisadi inkişaf, sosial məsələlər və Qarabağda Böyük Qayıdışın sürətləndirilməsi əsas istiqamətlər kimi diqqətə çatdırılıb.
