ABŞ Prezidenti Donald Trampın sosial şəbəkədəki son paylaşımı diqqət çəkib.

Tramp özünün “Truth Social” hesabında Ayın ABŞ bayrağı ilə təsvir olunduğu foto yayımlayıb və görüntünün üzərinə “Ay bizimdir” (“The Moon is ours”) ifadəsini əlavə edib. Paylaşım sentyabrın 6-da edilib və Tramp bununla bağlı ayrıca açıqlama verməyib.



ABŞ prezidentinin bu paylaşımı Vaşinqtonun kosmos siyasəti və Ayın gələcəkdə tədqiqi ilə bağlı planlarının müzakirə olunduğu bir vaxtda baş verib.

ABŞ administrasiyasının planlarına əsasən, ölkə 2028-ci ilə qədər Aya insanlı missiya göndərməyi, 2030-cu ilə qədər isə Ay səthində daimi infrastruktur yaratmağı hədəfləyir. Bu çərçivədə Ayda nüvə enerji qurğularının yerləşdirilməsi də nəzərdə tutulur.

Qeyd edək ki, beynəlxalq hüquqa görə Ay hər hansı dövlətin mülkiyyəti hesab edilə bilməz. 1967-ci il Kosmos haqqında Müqavilə dövlətlərin Ay və digər səma cisimləri üzərində suverenlik iddiası irəli sürməsini qadağan edir. Buna görə də Trampın paylaşımının hüquqi ərazi iddiası deyil, siyasi xarakterli ifadə olduğu anlaşılır.

İnsan ilk dəfə Ayın səthinə 20 iyul 1969-cu ildə “Apollo 11” missiyası çərçivəsində enib. Missiyanın heyət üzvü Nil Armstronq Ayda ilk addım atan insan olub. İnsanların Ay səthinə sonuncu enişi isə 1972-ci ilin dekabrında “Apollo 17” missiyası zamanı həyata keçirilib.