20 Yanvar faciəsi Azərbaycan xalqının azadlıq və müstəqillik uğrunda mübarizəsinin ən faciəli, eyni zamanda ən şərəfli səhifələrindən biridir. 1990-cı il yanvarın 19-dan 20-nə keçən gecə keçmiş SSRİ rəhbərliyinin göstərişi ilə sovet ordusunun Bakı şəhərinə və respublikanın bir sıra bölgələrinə yeridilməsi nəticəsində dinc əhaliyə qarşı amansız qırğın törədilib.
Həmin gecə fövqəladə vəziyyət elan edilmədən şəhərə daxil olan ağır hərbi texnika və silahlı qüvvələr günahsız insanlara atəş açıb. Rəsmi məlumatlara görə, faciə zamanı 150-dən çox azərbaycanlı şəhid olub, yüzlərlə insan yaralanıb, onlarla şəxs itkin düşüb.
Bu qanlı hadisə Azərbaycan xalqının azadlıq iradəsini sındırmaq məqsədi daşısa da, əksinə, milli birliyi daha da gücləndirib və müstəqillik yolunda qətiyyətini artırıb. 20 Yanvar faciəsi sovet imperiyasının əsl mahiyyətini ortaya qoyaraq, Azərbaycanın müstəqilliyə gedən yolunda dönüş nöqtəsi olub.
Ulu Öndər Heydər Əliyev 1990-cı il yanvarın 21-də Moskvada Azərbaycanın daimi nümayəndəliyində çıxış edərək bu qanlı cinayəti qətiyyətlə pisləyib. 1994-cü ildə isə Azərbaycan Respublikasının Milli Məclisi 20 Yanvar faciəsinə siyasi-hüquqi qiymət verib.
Hər il yanvarın 20-də Azərbaycan xalqı Şəhidlər xiyabanını ziyarət edir, Vətən uğrunda canından keçmiş qəhrəmanların xatirəsini dərin ehtiramla yad edir.
Qanuntv.az xəbər saytı adından 20 Yanvar şəhidləri başda olmaqla, Vətən uğrunda canını fəda etmiş bütün şəhidlərimizə Allahdan rəhmət, ailələrinə səbr diləyirik. Şəhidlərimizin xatirəsi qəlbimizdə əbədi yaşayacaq.
