Bu gün Azərbaycan Ordusunun həyata keçirdiyi, lakin uğursuzluqla nəticələnən Daşaltı əməliyyatının 34-cü ildönümüdür.

QanunTV.az xəbər verir ki, əməliyyat 1992-ci il yanvarın 25-i axşamdan 26-sı axşama qədər davam edib və əsas məqsəd Şuşa rayonunun Daşaltı kəndinin erməni silahlı birləşmələrindən azad olunması olub.

Əməliyyat üçün Şıxov taborundan 200 nəfərlik canlı qüvvə ayrılıb. Yanvarın 25-dən 26-na keçən gecə başlanan hərbi əməliyyata sabiq müdafiə naziri Tacəddin Mehdiyev rəhbərlik edib.

Əməliyyat planına əsasən, birinci mərhələdə taqım Nəbilər kəndi istiqamətindən hərəkət edərək Qızılqaya yüksəkliyinə qalxmalı, oradan Daşaltı–Sığnax yolunu nəzarətə götürməli idi. İkinci mərhələdə isə Daşaltıdan Şuşakənd istiqamətində olan yolun kəsilməsi nəzərdə tutulurdu.

Lakin əməliyyat zamanı hava şəraitinin son dərəcə sərt olması, rabitənin zəif təşkili, əməliyyat sirrinin vaxtından əvvəl yayılması və bələdçilərin xəyanəti nəticəsində hərbi tapşırıq uğurla başa çatmayıb.
Daşaltı əməliyyatı Azərbaycan hərb tarixində ağır itkilərlə yadda qalan və dərs çıxarılan mühüm hadisələrdən biri kimi xatırlanır.