Bu gün Qarabağ müharibəsinin ən faciəli və unudulmaz hadisələrindən biri olan Qaradağlı faciəsinin 34-cü ildönümüdür.
1992-ci il fevralın 17-də Ermənistan silahlı qüvvələri tərəfindən Xocavənd rayonunun Qaradağlı kəndində azərbaycanlı əhaliyə qarşı ağır soyqırımı cinayəti törədilib. Bu faciə Azərbaycan xalqının yaddaşında erməni vəhşiliyinin ən qanlı səhifələrindən biri kimi qalmaqdadır.
Həyata keçirilən qətliam nəticəsində Qaradağlı kəndində iki ailənin hər birindən 4 nəfər qətlə yetirilib, 43 ailə başçısını itirib, 146 uşaq yetim qalıb. Hücum zamanı öldürülənlər arasında 10 qadın və 8 məktəbyaşlı uşaq da olub.
Ümumilikdə 91 nəfər – kənd sakinlərinin hər 10 nəfərindən biri amansızcasına qətlə yetirilib. Qaradağlı kəndi tamamilə dağıdılıb, 200 yaşayış evi, mədəniyyət evi, 320 yerlik məktəb binası, 25 çarpayılıq xəstəxana və digər obyektlər məhv edilib. Bundan əlavə, azərbaycanlılara məxsus tarixi, dini və mədəni abidələr, eləcə də qəbiristanlıq vandalizmə məruz qalıb.
800-dək sakini olan Qaradağlı kəndi erməni qəddarlığının dəhşətli qurbanına çevrilib. Bu faciə bir daha sübut edir ki, Ermənistanın Azərbaycana qarşı həyata keçirdiyi etnik təmizləmə və soyqırımı siyasəti sistemli xarakter daşıyıb.
Azərbaycan xalqı Qaradağlı şəhidlərinin xatirəsini daim ehtiramla anır və bu cür cinayətlərin beynəlxalq ictimaiyyət tərəfindən tanınması üçün mübarizəsini davam etdirir.
Qanuntv.az
