2020-ci il oktyabrın 10-da Gəncə şəhərinə Ermənistan silahlı qüvvələri tərəfindən həyata keçirilən dördüncü raket hücumundan altı il ötür. Dinc sakinlərin həyatına son qoyan, yaşayış evlərini və mülki infrastrukturu dağıdan həmin hadisə Vətən müharibəsinin ən ağrılı səhifələrindən biri kimi yadda qalıb.

Qanuntv.az xatırladır ki, humanitar atəşkəs elan edildikdən sonra Gəncə yenidən raket atəşinə tutulub. Berd rayonu istiqamətindən “Skad” tipli ballistik raketlərlə həyata keçirilən hücum nəticəsində 10 nəfər həlak olub, 40 nəfər yaralanıb. Partlayışlar yaşayış məntəqələrində ciddi dağıntılara səbəb olub, mülki əhalinin təhlükəsizliyinə ağır zərbə vurub.

Həmin gün Mingəçevir Su Elektrik Stansiyası da hədəfə alınıb. Məlumatlara görə, stansiyaya yönələn raketlər Azərbaycan Ordusunun hava hücumundan müdafiə sistemləri tərəfindən zərərsizləşdirilib.

İkinci Qarabağ müharibəsi dövründə Gəncə şəhəri ümumilikdə beş dəfə raket hücumuna məruz qalıb. Bu hücumlar nəticəsində 26 nəfər həyatını itirib, 175 nəfər yaralanıb. Dağıntılar, yarımçıq qalmış ömürlər və ailələrin yaşadığı ağır itkilər müharibənin mülki əhali üçün doğurduğu faciələrin miqyasını bir daha nümayiş etdirib.

Gəncəyə edilən raket hücumları Azərbaycan xalqının yaddaşında dərin iz buraxıb. Həlak olan dinc sakinlərin xatirəsi ehtiramla yad edilir, onların itkisi ilə bağlı ağrı və kədər illər keçsə də unudulmur.