İran İslam İnqilabı Keşikçiləri Korpusu (SEPAH) İordaniyada yerləşən ABŞ hərbi bazasına ballistik raketlərlə zərbə endirdiyini və hücum nəticəsində çox sayda amerikalı hərbçinin məhv edildiyini açıqlayıb.
Qanuntv.az xəbər verir ki, bu barədə SEPAH-ın mətbuat xidmətinin yaydığı bəyanatda bildirilib.
Bəyanatda qeyd olunub ki, SEPAH-ın Aerokosmik Qüvvələri “Təcavüzkarın cəzalandırılması” əməliyyatının ikinci dalğası çərçivəsində Akaba körfəzi sahilində yerləşən və “Kemp-Titin” kimi tanınan ABŞ dəniz piyadaları bazasına kütləvi ballistik raket zərbələri endirib.
SEPAH-ın iddiasına görə, hücum nəticəsində çox sayda ABŞ hərbçisi öldürülüb, həmçinin bir neçə mühüm obyekt və zərbə helikopterləri sıradan çıxarılıb.
Qeyd edək ki, bundan əvvəl ABŞ Silahlı Qüvvələrinin Mərkəzi Komandanlığı İran ərazisindəki hədəflərə silsilə zərbələr endirildiyini açıqlayıb. İranın Press TV telekanalının məlumatına görə, partlayışlar ölkənin cənub sahillərində, o cümlədən Kiş adasında və bir sıra şəhərlərdə qeydə alınıb.
ABŞ Prezidenti Donald Tramp isə ABŞ obyektlərinə qarşı yeni hücumlar olacağı təqdirdə İrana qarşı daha sərt tədbirlər görüləcəyini və İran İslam Respublikasının məhv ediləcəyini bildirib.
Hazırda tərəflərin qarşılıqlı zərbələrlə bağlı açıqlamaları arasında ciddi fərqlər var və SEPAH-ın ABŞ hərbçilərinin itkisi ilə bağlı iddiaları müstəqil mənbələr tərəfindən təsdiqlənməyib.
