Ermənistanın Zəngəzur bölgəsində Azərbaycan hərbçisinin saxlanılması ilə bağlı Azərbaycan və Ermənistan tərəfindən rəsmi açıqlamalar verilib.
Qanuntv.az xəbər verir ki, Ermənistan Milli Təhlükəsizlik Xidmətinin məlumatına əsasən, oktyabrın 1-də saat 14:15-də Şəki kəndində Azərbaycan hərbçisi saxlanılıb. Faktla bağlı Ermənistan İstintaq Komitəsində araşdırma aparıldığı bildirilib.
Azərbaycan Baş Prokurorluğu isə açıqlamasında saxlanılan hərbçinin Nəsimi Rasim oğlu Musayev olduğunu açıqlayıb.
Məlumata görə, Nəsimi Musayev Laçın rayonu istiqamətində yerləşən hərbi hissələrdən birində müddətli həqiqi hərbi xidmət keçib. Sentyabrın 26-da onun xidmət yerində olmaması və olduğu yerin müəyyən edilməməsi ilə əlaqədar axtarış tədbirlərinə başlanılıb.
Hərbi Prokurorluqda aparılan araşdırma nəticəsində Nəsimi Musayevin hərbi hissəni özbaşına tərk etməsinə əsaslı şübhələr müəyyən edilib və bununla bağlı cinayət işi başlanılıb.
Axtarış tədbirləri nəticəsində hərbçinin Ermənistan ərazisində olduğu və həmin ölkənin aidiyyəti orqanları tərəfindən saxlanıldığı müəyyən edilib.
Baş Prokurorluq bildirib ki, hazırda Nəsimi Musayevin Ermənistan ərazisində olması, saxlanılması və hadisənin digər hallarının aydınlaşdırılması məqsədilə Azərbaycan dövlət qurumları ilə Ermənistanın müvafiq qurumları arasında zəruri təmaslar davam etdirilir.
Məsələ ilə bağlı Ermənistan Müdafiə Nazirliyi də açıqlama yayıb. Nazirlik Azərbaycan hərbçisinin saxlanılması xəbəri fonunda Ermənistan sosial şəbəkələrinin seqmentində yayılan bəzi məlumatların həqiqəti əks etdirmədiyini bildirib.
Belə məlumatlar sırasında Ermənistan ərazisində Azərbaycanın diversiya qrupunun olması və erməni hərbçinin öldürülməsi ilə bağlı iddiaların da yer aldığı qeyd olunub. Ermənistan Müdafiə Nazirliyi bu iddiaları təkzib edib.
Hazırda hadisənin bütün hallarının araşdırılması davam etdirilir. Azərbaycan Baş Prokurorluğu istintaqın gedişi və nəticələri barədə qanunvericiliyin tələblərinə uyğun olaraq ictimaiyyətə əlavə məlumat veriləcəyini bildirib.
