Bakıda mikromobillik infrastrukturunun genişləndirilməsi istiqamətində işlər davam etdirilir.
Qanuntv.az xəbər verir ki, bu barədə Azərbaycan Yerüstü Nəqliyyat Agentliyi (AYNA) məlumat yayıb.
Məlumata görə, məqsəd mikromobillik zolaqları şəbəkəsinin davamlılığını təmin etmək, velosiped və skuter istifadəçilərinin təhlükəsiz və rahat hərəkətinə şərait yaratmaqdır.
Görülən işlər çərçivəsində Bülbül prospektinin daha bir hissəsində mikromobillik zolağı təşkil edilib. Mirzəağa Əliyev küçəsi ilə Neftçilər prospekti arasındakı zolaq uzadılaraq Salatın Əsgərova küçəsinədək davam etdirilib.
Ərazidə müvafiq yol nişanlarının quraşdırılması həyata keçirilir. Yaxın günlərdə təhlükəsizlik sədlərinin də quraşdırılması nəzərdə tutulur.
Hazırda Bakıda mikromobillik zolaqlarının ümumi uzunluğu 67,5 kilometrə çatıb. Şəhər konsepsiyasına uyğun olaraq bu şəbəkənin gələcəkdə daha da genişləndirilməsi planlaşdırılır.
AYNA-nın məlumatına görə, mikromobillik infrastrukturunun genişləndirilməsi istifadəçi sayının artmasına da təsir göstərib. 2026-cı ilin sentyabrında Bakıda velosiped və skuterlərdən istifadə etməklə 548 min səfər həyata keçirilib.
Həmin ay mikromobillik vasitələrindən istifadə edənlərin sayı 264 050 nəfər, qət edilən ümumi məsafə isə 2 milyon 648 min kilometr təşkil edib.
Bildirilib ki, sifarişlərin, istifadəçi sayının və qət edilən məsafənin həcmi üzrə bu göstəricilər rekord səviyyədədir.
