Birləşmiş Millətlər Təşkilatında keçirilən tədbirdə qadınların zorakılıqdan müdafiəsi və ədalətə çıxışının təmin edilməsi sahəsində Azərbaycanın təcrübəsi təqdim olunub.
Bahar Muradova bildirib ki, Azərbaycanda qadınların zorakılıqdan qorunması və ədalətə çıxış imkanlarının gücləndirilməsi istiqamətində hüquqi və institusional mexanizmlər təkmilləşdirilib. Onun sözlərinə görə, qanunvericilik beynəlxalq öhdəliklərə uyğunlaşdırılıb, mühafizə orderləri və sosial dəstək mexanizmləri genişləndirilib.
Bu barədə Azərbaycan Respublikasının Ailə, Qadın və Uşaq Problemləri üzrə Dövlət Komitəsinin sədri Bahar Muradova BMT-nin Qadınların Statusu üzrə Komissiyasının 70-ci sessiyası çərçivəsində keçirilən yan tədbirdə çıxışı zamanı deyib. Tədbir Türkiyənin təşəbbüsü və Azərbaycanın həmtəşkilatçılığı ilə BMT-nin İqtisadi və Sosial Şurasında təşkil olunub.
Komitə sədri qeyd edib ki, qadınların ədalətə çıxış imkanlarının texnoloji vasitələrlə genişləndirilməsi mövzusunun beynəlxalq səviyyədə müzakirəsi böyük əhəmiyyət daşıyır. O bildirib ki, hüququn mövcudluğu ilə yanaşı, ona real çıxışın təmin olunması vacibdir.
Bahar Muradovanın sözlərinə görə, ədalətə çıxış artıq təkcə hüquqi mexanizm deyil, həm də inkişafın, təhlükəsizliyin və insan hüquqlarının əsas şərtlərindən biridir. Bu məsələ Birləşmiş Millətlər Təşkilatının Dayanıqlı İnkişaf Məqsədləri ilə birbaşa bağlıdır. Xüsusilə gender bərabərliyini nəzərdə tutan 5-ci və sülh, ədalət və güclü institutları əhatə edən 16-cı məqsədin bir-birini tamamladığı vurğulanıb.
O qeyd edib ki, rəqəmsal transformasiya ədalət sistemlərinə yeni imkanlar yaradır. Elektron müraciət sistemləri, onlayn hüquqi məlumat bazaları və rəqəmsal monitorinq mexanizmləri qadınların hüquqlarının müdafiəsini gücləndirərək hüquqi prosedurların daha operativ həyata keçirilməsinə şərait yaradır.
Komitə sədri əlavə edib ki, rəqəmsal ədalət əlçatanlıq, təhlükəsizlik və məxfilik prinsiplərinə əsaslanmalıdır. Süni intellekt və avtomatlaşdırılmış sistemlərin hüquqi proseslərdə tətbiqi zamanı gender həssaslığının və qərəzsizliyin qorunması vacibdir. Əks halda, alqoritmik qərəz mövcud bərabərsizlikləri daha da dərinləşdirə bilər.
Bahar Muradova çıxışında vurğulayıb ki, ədalətin gələcəyi texniki baxımdan rəqəmsal olsa da, mahiyyət etibarilə etik prinsiplərə və insan hüquqlarına əsaslanmalıdır. Onun sözlərinə görə, texnologiyalar inklüziv olmalı və yeni rəqəmsal uçurum yaratmamalıdır.
