Milli Məclisin Səhiyyə komitəsinin sədri, akademik Əhliman Əmiraslanov TƏBİB-in tabeliyində çalışan tibb işçilərinin əməkhaqlarının artırılmasını Azərbaycan səhiyyəsində insan kapitalına yönəlmiş mühüm addım kimi qiymətləndirib.
Akademik bildirib ki, Azərbaycanda səhiyyə sisteminin inkişaf etdirilməsi, qabaqcıl standartların tətbiqi və tibb işçilərinin sosial rifahının gücləndirilməsi daim dövlət rəhbərliyinin diqqət mərkəzində olub.
Əhliman Əmiraslanovun sözlərinə görə, Azərbaycanın Birinci vitse-prezidenti Mehriban Əliyevanın tibb işçilərinin maddi rifahının yaxşılaşdırılması və onların əməyinin daha yüksək qiymətləndirilməsi məqsədilə irəli sürdüyü təşəbbüs mühüm əhəmiyyət daşıyır.
O qeyd edib ki, Prezident İlham Əliyev təşəbbüsü müsbət qarşılayaraq onun icrası ilə bağlı müvafiq tapşırıq verib.
“Bu xoş hadisə sosial xarakterli qərar olmaqla yanaşı, həm də Azərbaycan səhiyyəsində insan kapitalına qoyulan sərmayədir. Əməkhaqqının artırılması zamanı iş yükü, ixtisas və regionlarda mövcud kadr ehtiyacının nəzərə alınması, diferensial yanaşmanın tətbiqi həkimlərin motivasiyasına, peşəkar kadrların sistemdə saxlanmasına və regionlara cəlb edilməsinə müsbət təsir göstərə bilər”, – deyə komitə sədri vurğulayıb.
Akademik bildirib ki, tibb işçilərinin əməkhaqlarının yüksəldilməsi regionlarda göstərilən tibbi xidmətlərin keyfiyyətinin artırılmasına da şərait yarada bilər.
Onun sözlərinə görə, son illərdə Azərbaycanda səhiyyə sistemində mərhələli və ardıcıl islahatlar həyata keçirilir. Bu siyasətin əsas məqsədlərindən biri əhalinin sağlamlığının qorunmasında səhiyyənin rolunu gücləndirmək, sistemi qabaqcıl dünya təcrübəsi əsasında daha çevik və səmərəli mexanizmlərlə inkişaf etdirməkdir.
Əhliman Əmiraslanov qeyd edib ki, səhiyyə sahəsinə göstərilən diqqət nəticəsində tibb infrastrukturunun müasirləşdirilməsi, tibb müəssisələri şəbəkəsinin genişləndirilməsi və tibbi xidmətlərin keyfiyyətinin yüksəldilməsi istiqamətində mühüm işlər görülüb.
Komitə sədrinin fikrincə, TƏBİB-in idarəetmə modeli klassik dövlət idarəçiliyindən fərqli olaraq daha müasir və praqmatik yanaşmanı özündə əks etdirir.
“İdarəetmə sisteminin optimallaşdırılması, maliyyə və xidmət funksiyalarının ayrılması, TƏBİB-in gücləndirilməsi və vətəndaşyönümlü xidmət modelinə keçid də məhz buna hesablanıb. İslahatın tətbiqi ilə tibb işçilərinin sosial rifahının gücləndirilməsi, peşənin cəlbediciliyinin artırılması, həkimlərin regionlara cəlb edilməsinin stimullaşdırılması, fəaliyyət nəticələrinin daha dolğun qiymətləndirilməsi və göstərilən tibbi xidmətlər üzrə pasiyent məmnuniyyətinin yüksəldilməsi hədəflənir”, – deyə Əhliman Əmiraslanov bildirib.
Akademik vurğulayıb ki, həyata keçirilən tədbirlərin mərkəzində insan amili və vətəndaşların həyat şəraitinin yaxşılaşdırılması dayanır.
