İşğaldan azad edilmiş ərazilərə Böyük Qayıdış proqramı çərçivəsində Ağdam şəhərinə növbəti köç karvanı Bakıdan yola düşüb.

QanunTV.az xəbər verir ki, sentyabrın 1-də həyata keçirilən növbəti köç mərhələsində 117 ailə olmaqla, 362 nəfər Ağdam şəhərinə köçürülür.

Köç Prezident İlham Əliyevin tapşırığına uyğun olaraq işğaldan azad edilmiş ərazilərdə həyata keçirilən Böyük Qayıdış proqramı çərçivəsində təşkil olunub.

Doğma yurda qayıdan sakinlər onlara göstərilən hərtərəfli dövlət qayğısına görə Prezident İlham Əliyevə və Birinci vitse-prezident Mehriban Əliyevaya təşəkkürlərini bildiriblər.

Ağdam sakinləri, həmçinin torpaqlarımızın işğaldan azad olunması uğrunda döyüşən rəşadətli Azərbaycan Ordusuna, qəhrəman əsgər və zabitlərimizə minnətdarlıqlarını ifadə edib, Vətən uğrunda canından keçən şəhidlərimizə Allahdan rəhmət diləyiblər.

Qeyd edək ki, Böyük Qayıdış proqramı çərçivəsində işğaldan azad edilmiş ərazilərə keçmiş məcburi köçkünlərin mərhələli şəkildə doğma yurdlarına qayıdışı davam etdirilir.