Mayın 4-ü Vətən müharibəsinin yeganə qadın şəhidi Arəstə Baxışovanın doğum günüdür.

Arəstə Kərim qızı Baxışova 1989-cu ildə Xaçmaz şəhərində anadan olub. Atası Kərim Baxışov Fövqəladə Hallar Nazirliyinin Mühafizə İdarəsində rəis vəzifəsində çalışıb və Arəstənin cəmi dörd yaşı olarkən vəfat edib.
O, 1995–2004-cü illərdə Biləcəri qəsəbəsində yerləşən Şuşa şəhər 3 nömrəli tam orta məktəbdə təhsil alıb.

Daha sonra 2004–2008-ci illərdə Azərbaycan Dövlət Pedaqoji Kollecində ingilis dili ixtisası üzrə oxuyub.
2018–2019-cu illərdə Azərbaycan Silahlı Qüvvələrinin Baş Hərbi Hospitalında tibbi statist kimi fəaliyyət göstərən Arəstə Baxışova, 2019-cu il iyulun 12-dən etibarən Silahlı Qüvvələrin “N” saylı hərbi hissəsində operator vəzifəsində xidmət edib.

Vətən müharibəsi zamanı o, Füzuli, Zəngilan və Qubadlı istiqamətlərində gedən döyüşlərdə yaralı hərbçilərə birbaşa döyüş meydanında tibbi yardım göstərib. Arəstə Baxışova 23 oktyabr tarixində Qubadlının azadlığı uğrunda gedən döyüşlərdə şəhidlik zirvəsinə ucalıb.

Şəhid Biləcəri qəsəbəsinin Şəhidlər xiyabanında dəfn olunub.

Azərbaycan Prezidenti İlham Əliyevin sərəncamına əsasən, Arəstə Baxışova ölümündən sonra “Vətən uğrunda” medalı ilə təltif edilib.

Qeyd edək ki, Arəstə Baxışova iki övlad anası idi — Mərdan və Zəhra onun yadigarı olaraq qalıb.