Ali məktəblərə qəbul imtahanının nəticələri açıqlanıb. III ixtisas qrupu üzrə hər iki mərhələnin cəminə əsasən ən yüksək nəticəni Sumqayıt şəhər 12 nömrəli tam orta məktəbin məzunu Fidan İlham qızı Hüseynzadə göstərib.
Qanuntv.az xəbər verir ki, abituriyent ümumilikdə 690 bal toplayaraq ölkə birincisi olub. O, qəbul imtahanının birinci mərhələsində 293.8, ikinci mərhələsində isə 396.2 bal toplayıb.
Fidan Hüseynzadə bildirib ki, yüksək nəticə gözləsə də, ölkə birincisi olacağını düşünməyib:
"Ölkə birincisi olmaq hissini sizə necə ifadə edim, bilmirəm. Nəticələr açıqlanmamışdan öncə də təxmin edirdim ki, yüksək bal toplamışam, amma bu qədərini düşünə bilmirdim", - deyə o qeyd edib.
Gələcəkdə hüquqşünas olmaq istədiyini bildirən Fidan, IX sinifdən etibarən hazırlıqlara başladığını və uğurunun arxasında zəhmət, müəllimlərinin dəstəyi və mütaliəyə olan marağının dayandığını vurğulayıb.
Abituriyentin sözlərinə görə, əsas məqsədi gələcəkdə peşəkar kadr kimi ölkəsini layiqincə təmsil etmək və magistratura təhsili almaqdır.
