Azərbaycan Tibb Universiteti və "Xocalı Soyqırımını Tanıtma" ictimai birliyinin birgə təşkilatçılığı ilə Tibb elmləri doktoru, Professor, Əməkdar müəllim Mübariz Allahverdiyevin ürək ağrısı ilə qələmə aldığı "Xocalı harayı" kitabının təqdimat mərasimi keçirilib. Mərasimi Azərbaycan Tibb Universitetinin (ATU) Prorektoru, dosent Mahir Səfərov açdı. Azərbaycanın Dövlət Himni səsləndirildi, şəhidlərin əziz xatirəsi 1 dəqiqəlik sükutla yad edildi. Mahir həkim tədbirə toplaşan tibb işçilərini peşə bayramları günü ilə əlaqədar təbrik etdi.Mahir həkim, müəllimi olmuş Prof. M.Allahverdiyevin ömür yolu barədə qısa məlumat verdi. "Xocalı Soyqırımını Tanıtma" ictimai birliyinin sədri, jurnalist Şamil Sabiroğlu həm də həmin Təşkilatın Ağsaqqallar Şurasının sədri vəzifəsini icra edən (ictimai əsaslarla) M. Allahverdiyevin insani keyfiyyətlərindən danışdı. O, dedi: "əslən Xocalıdan olan Mübariz müəllim şərəfli bir ömür yaşayıb. Sevindicidir ki, Mübariz həkimin hər iki övladı tibb işçisidir və onun yolunu ləyaqətlə davam etdirir. Mübariz müəllimin çap etdirdiyi "Xocalı harayı" kitabı bu qədim türk yurdunda baş edən soyqırımdan bəhs olunur. Mübariz həkim həm də bunu poetik dillə oxucuların nəzərinə çatdırır".
ATU-nun İnsan Anatomiyası və Tibbi Terminologiya Kafedrasının müdiri, Prof.Nəriman Mövsümov, bu təhsil ocağının Oftalmologiya kafedrasının müdiri, Prof. Paşa Qəlbinur, ATU-nun dosenti, Əməkdar həkim Taryel Eyvazov, Azərbaycanın Milli Qəhrəmanı, şəhid Şirin Mirzəyevin ömür-gün yoldaşı Flora Qasımova, 44gunsavash.az saytının baş redaktoru, yazıçı - publisist Mövsümağa Ədalət oğlu, "Azərbaycanın Milli Qəhrəmanı Asif (Fred) Məhərrəmov adına İnkişaf Fondu" nun sədri, qazi Ədalət Məhərrəmov, "Qarabağ Qaziləri" ictimai birliyinin sədr müavini, qazi Seymur Abdullayev, Azərbaycanın Milli Qəhrəmanı, şəhid Salatın Əsgərovanın gəlini Günay Əsgərova və başqaları nurlu insan, istedadlı alim Mübariz Abdullayevə gələcək işlərində uğurlar arzuladılar.
Daha sonra söz "Xocalı harayı" kitabının müəllifi M.Allahverdiyevə verildi. O, dedi: 2020-ci ilin sentyabr ayında başlanan II Vətən savaşına kimi içimdə ciddi narahatçılıq vardı.Əmin deyildim ki, bu tezliklə düşmən tapdağında olan torpaqlarımız geri qayıdacaq. Ali Baş Komandan cənab İlham Əliyevin rəhbərliyi altında aparılan hücum əməliyyatları, həmçinin, 2023-cü il sentyabrın 19-20-də aparılan lokal antiterror əməliyyatları qəlbimi riqqətə gətirdi.Tam əmin oldum ki, həqiqətən də Ali Baş Komandan nəyin və nə vaxt baş verəcəyini çox yaxşı bilirmiş. "Xocalı harayı" kitabı bundan sonra yarandı. Bu kitabda Xocalı soyqırımında yaşanan vəhşəti qələmimlə və poetik dillə dilə gətirdim.
Professor M.Allahverdiyev tədbirin təşkilatçılarına öz təşəkkürünü bildirdi.
Tədbirin sonunda xatirə şəkilləri çəkildi.
Mövsümağa Ədalət oğlu,
AJB üzvü, yazıçı-publisist.
18.06.2026.
