Dövlət qulluğunda əməkhaqqı sisteminin təkmilləşdirilməsi istiqamətində aparılan son islahatlar çərçivəsində mühüm dəyişiklik nəzərdə tutulur. Yeni yanaşmaya əsasən, dövlət qulluqçuları üçün tətbiq edilən mükafatlandırma mexanizmi tamamilə ləğv edilir.

Bununla bağlı dəyişikliklər Milli Məclis tərəfindən qəbul edilən “Dövlət qulluğu haqqında” Qanuna və digər normativ hüquqi aktlara daxil edilib.

Qanunvericiliyə edilən yeniliklərə əsasən, dövlət büdcəsi hesabına ödənilən bütün növ mükafatlar – həm kollektiv, həm də fərdi təşviq ödənişləri artıq tətbiq olunmayacaq. İndiyədək dövlət qulluqçularının fəaliyyətinə görə verilən əlavə mükafatlar bundan sonra əməkhaqqı sistemindən çıxarılır.

Əvvəlki qaydalara görə isə dövlət qulluqçularının mükafatlandırılması məqsədilə hər il dövlət büdcəsindən əlavə vəsait ayrılırdı. Bu vəsaitin həcmi əməkdaşın aylıq vəzifə maaşının üç misli qədər müəyyən edilirdi və əsasən bayram günlərində kollektiv mükafatlar, eləcə də xidmətdə fərqlənən şəxslər üçün fərdi mükafatlar şəklində ödənilirdi.

Yeni sistemin tətbiqi ilə əməkhaqqının daha sabit, şəffaf və əvvəlcədən proqnozlaşdırıla bilən olması hədəflənir. Bununla da dövlət qulluqçularının gəlirlərinin əsasən sabit maaş üzərində formalaşması təmin ediləcək.