Hərbçilərin pensiya məbləği ilə təminat xərcliyi arasındakı əlaqənin aradan qaldırılması, pensiyaların fərdi şəxsi hesabda qeydə alınmış pensiya kapitalı və sabit məbləğdə aylıq pensiya əlavəsi əsasında hesablanması təklif olunur.
Qanuntv.az xəbər verir ki, sözügedən məsələ Milli Məclisin iclasında müzakirəyə çıxarılan bir sıra qanunlara dəyişiklik edilməsi barədə qanun layihəsində əksini tapıb.
Təklifə əsasən, hər bir rütbə üzrə xidmətdə olmanın son yaş həddi həmin rütbə üzrə pensiya yaşı kimi müəyyən ediləcək. Sığorta mexanizmi gücləndiriləcək və fərdi şəxsi hesabda qeydə alınmış pensiya kapitalı əsasında ümumi qaydada pensiya təyin edilərək ödəniləcək.
Eyni zamanda, əmək pensiyasına qulluq stajına görə əlavə əvəzinə sabit məbləğdə aylıq pensiya əlavəsinin təyin edilməsi nəzərdə tutulur. Aylıq pensiya əlavəsinin məbləği hərbi rütbələr üzrə müəyyənləşdiriləcək.
Təklif olunan yeni yanaşmaya əsasən, hərbçilərin daha uzun müddət xidmətdə qalması stimullaşdırılacaq. Xidmət müddəti artdıqca onların vəzifə və rütbələri, əməkhaqları və pensiya kapitalları da arta biləcək.
İslahat nəticəsində hərbçilərin pensiya təyinatı sisteminin sadələşdirilməsi və pensiyaların elektron qaydada daha qısa müddətdə təyin olunması nəzərdə tutulur.
Bundan əlavə, Müdafiə Nazirliyinin bütün hərbi qulluqçularının əməkhaqlarının vergilər və digər icbari ödənişlər çıxıldıqdan sonra orta hesabla 22,8 faiz artacağı bildirilir.
Yeni yanaşma çərçivəsində baza maaşı olan vəzifə maaşının rütbə maaşı ilə əvəzlənməsi, rütbə maaşının həcminin isə 70 faizə çatdırılması təklif olunur.
