Bu gün Azərbaycanın Milli Qəhrəmanı, I Qarabağ müharibəsi şəhidi Gültəkin Məlik qızı Əsgərovanın anım günüdür.
Qanuntv.az xəbər verir ki, Gültəkin Əsgərova 1960-cı il noyabrın 20-də Bakı şəhərində anadan olub.
1985-ci ildə Azərbaycan Dövlət Tibb İnstitutunu bitirən Gültəkin Əsgərova əmək fəaliyyətinə 8 nömrəli təcili yardım stansiyasında başlayıb. Daha sonra Respublika Kliniki Uroloji Xəstəxanada çalışıb.
Qarabağ müharibəsi başladığı dövrdə o, ailəsini geridə qoyaraq, könüllü şəkildə cəbhəyə yollanıb. 1992-ci il aprelin 4-də döyüş bölgəsinə gedən Gültəkin Əsgərova Turşsu, Şuşa xəstəxanalarında və Ağdamın Mahrızlı kəndində yerləşən hospitalda hərbi həkim kimi xidmət göstərib.
O, özü ilə beş tibb bacısını da götürərək yaralı əsgərlərə tibbi yardım göstərmək üçün döyüş bölgələrində fəaliyyət göstərib. Şuşanın müdafiəsi zamanı göstərdiyi fədakarlıq və qəhrəmanlığı ilə seçilib.
Şuşa şəhərinin işğalından sonra da mübarizəni davam etdirən Gültəkin Əsgərova Laçın və Qubadlı istiqamətlərində gedən döyüşlərdə iştirak edib.
1992-ci il mayın 14-də Ağdam istiqamətində gedən döyüşlərə yollanan qəhrəman həkim Mahrızlı kəndində yerləşən hospitalda xidmətini davam etdirib. Aranzəmin yüksəkliyi uğrunda gedən döyüşlər zamanı ön cəbhəyə yaxınlaşaraq yaralılara yardım göstərib.
Gültəkin Əsgərova 1992-ci il iyunun 20-də Aranzəmin yüksəkliyi uğrunda gedən döyüşlərdə şəhid olub.
O, Bakıdakı Şəhidlər xiyabanında dəfn edilib. Milli Qəhrəmanın Əminə adlı qızı yadigar qalıb.
Gültəkin Əsgərovanın xatirəsi daim əziz tutulur. Onun təhsil aldığı 200 nömrəli orta məktəbə adı verilib və burada büstü ucaldılıb.
20 noyabr 1993-cü il tarixində imzalanmış fərmanla Gültəkin Məlik qızı Əsgərova ölümündən sonra "Azərbaycanın Milli Qəhrəmanı" adına layiq görülüb.
