Qanuntv.az xəbər verir ki, bu barədə Azərbaycan Səhiyyə Nazirliyi məlumat yayıb. Bildirilib ki, səhiyyə naziri Teymur Musayev bununla bağlı müvafiq əmr imzalayıb.

Əmrə əsasən, ölkənin şəhər və rayonlarında müxtəlif səbəblərdən vaksinasiyadan kənarda qalan uşaqların “İmmunlaşdırma həftəsi” çərçivəsində peyvəndlərə cəlb edilməsi nəzərdə tutulur. Eyni zamanda, peyvəndlə əhatə səviyyəsinin aşağı olduğu bölgələrdə monitorinqlər aparılacaq, tibb müəssisələrinə metodiki dəstək göstəriləcək və əhali arasında maarifləndirmə işləri gücləndiriləcək.

Həftə çərçivəsində bir sıra rayonlarda müxtəlif tədbirlərin təşkili planlaşdırılır. Bununla yanaşı, əhali üçün məlumatlandırıcı posterlər və yaddaş vərəqələri hazırlanaraq tibb müəssisələrində paylanacaq.

Qeyd edək ki, “İmmunlaşdırma həftəsi” Ümumdünya Səhiyyə Təşkilatının təşəbbüsü ilə 2006-cı ildən etibarən Avropa regionunda hər il keçirilir və Azərbaycan da bu təşəbbüsə qoşulur.