İyunun 26-da Dənizkənarı Milli Park ərazisində bir sıra yeni layihələrin təqdimat mərasimləri keçirilib.
QanunTV.az xəbər verir ki, tədbirlərdə Heydər Əliyev Fondunun vitse-prezidenti Leyla Əliyeva və Bakı Media Mərkəzinin rəhbəri Arzu Əliyeva iştirak ediblər.
Təqdim olunan layihələr sırasında “Boulevard Sports Club” idman klubunun açılışı, “WasteShark” üzən sutəmizləmə qurğusunun təqdimatı və elektrik mühərrikli faytonların istifadəyə verilməsi yer alıb.
Bildirilib ki, “Boulevard Sports Club” Dənizkənarı Milli Parkda sağlam həyat tərzinin təşviqi və idman infrastrukturunun genişləndirilməsi məqsədilə yaradılıb. Klubda müasir fitnes zalı, padel kortları və müxtəlif idman imkanları təqdim olunur.
Daha sonra Bakı buxtasının ekoloji vəziyyətinin yaxşılaşdırılması məqsədilə “WasteShark” üzən sutəmizləmə qurğusu nümayiş etdirilib. Qurğu su səthindəki tullantıları, üzvi qalıqları və çirkləndirici maddələri toplamaq üçün nəzərdə tutulub.
Qeyd olunub ki, layihə Heydər Əliyev Fondunun vitse-prezidenti, IDEA İctimai Birliyinin təsisçisi və rəhbəri Leyla Əliyevanın təşəbbüsü ilə həyata keçirilib.
Həmçinin Bakı Bulvarında ziyarətçilərə yeni istirahət imkanı yaradan elektrik mühərrikli faytonların təqdimatı keçirilib. Ekoloji təmiz və səssiz nəqliyyat vasitələri bulvar ərazisində xüsusi marşrut üzrə fəaliyyət göstərəcək.
Tədbirlər zamanı Leyla Əliyeva və Arzu Əliyeva şəhər sakinləri ilə görüşüb, onlarla xatirə şəkilləri çəkdiriblər.
