Azərbaycan Respublikasının Prezidenti İlham Əliyev iyulun 7-də ABŞ Senatının Xarici Əlaqələr Komitəsinin üzvü, Avropa və Regional Təhlükəsizlik Əməkdaşlığı üzrə Alt Komitəsinin sədri, senator Stiv Deynsi qəbul edib.
Qanuntv.az xəbər verir ki, görüş zamanı Azərbaycan ilə ABŞ arasında münasibətlərin hazırkı vəziyyəti, strateji tərəfdaşlıq əlaqələrinin inkişaf perspektivləri, regional təhlükəsizlik məsələləri və nəqliyyat əməkdaşlığı müzakirə olunub.
Prezident İlham Əliyev ABŞ Prezidenti Donald Trampın ikinci dəfə prezident seçilməsindən sonra iki ölkə arasında əməkdaşlıq və qarşılıqlı etimada əsaslanan münasibətlərin uğurla inkişaf etdiyini vurğulayaraq, Azərbaycan–ABŞ əlaqələrinin strateji tərəfdaşlıq səviyyəsinə yüksəldiyini bildirib. Dövlət başçısı qeyd edib ki, bu münasibətlər həm ölkələrimiz, həm də bütövlükdə region üçün mühüm əhəmiyyət kəsb edir.
Prezident İlham Əliyev ABŞ-nin vitse-prezidenti Cey. Di. Vensin Azərbaycana səfərini məmnunluqla xatırlayaraq, həmin səfər çərçivəsində imzalanmış "Azərbaycan Respublikası Hökuməti ilə Amerika Birləşmiş Ştatları Hökuməti arasında Strateji Tərəfdaşlıq Xartiyası"nın ikitərəfli əlaqələrin genişləndirilməsi baxımından mühüm rol oynadığını vurğulayıb.
Dövlət başçısı Donald Trampla şəxsi münasibətlərinin yüksək səviyyədə olduğunu bildirərək, onun Azərbaycan ilə Ermənistan arasında sülh prosesinin irəliləməsində xüsusi rol oynadığını diqqətə çatdırıb.
Prezident İlham Əliyev senator Stiv Deynsin ölkəmizə əvvəlki səfərindən sonra regionda mühüm tarixi hadisələrin baş verdiyini qeyd edib, Azərbaycan–ABŞ münasibətlərinin inkişafı istiqamətində göstərdiyi səylərə görə qonağa təşəkkürünü bildirib.
Senator Stiv Deyns isə son dövrlərdə iki ölkə arasında münasibətlərin dinamik inkişaf etdiyini vurğulayaraq, Prezident İlham Əliyevin ötən ilin avqustunda Vaşinqtona səfərini əlamətdar hadisə kimi qiymətləndirib. O, Azərbaycanın Prezident İlham Əliyevin rəhbərliyi altında geosiyasi baxımdan mühüm aktora çevrildiyini bildirib.
Qonaq, həmçinin Azərbaycan ilə Ermənistan arasında münasibətlərin normallaşdırılması və sülh gündəliyinin irəli aparılması istiqamətində nümayiş etdirilən siyasi iradəyə görə Prezident İlham Əliyevə minnətdarlığını ifadə edib.
Görüş zamanı TRIPP dəhlizinin regional nəqliyyat əlaqələrinin inkişafı baxımından əhəmiyyəti qeyd olunub, Azərbaycan ilə ABŞ Senatı arasında dialoqun genişləndirilməsi və tərəfdaşlığın gələcək perspektivləri ətrafında fikir mübadiləsi aparılıb.
