Azərbaycan Prezidenti İlham Əliyev sentyabrın 14-də Birləşmiş Ərəb Əmirliklərinin (BƏƏ) milli təhlükəsizlik müşaviri, Əbu-Dabi Əmirliyi hakiminin müavini Şeyx Tahnun bin Zayed Al Nəhyanı qəbul edib.
Qanuntv.az xəbər verir ki, qonaq BƏƏ Prezidenti Şeyx Məhəmməd bin Zayed Al Nəhyanın salamlarını dövlət başçısına çatdırıb.
Prezident İlham Əliyev salamlarına görə minnətdarlığını bildirib və öz salamlarını da BƏƏ Prezidentinə çatdırmağı xahiş edib.
Görüş zamanı Azərbaycan ilə BƏƏ arasında strateji tərəfdaşlıq münasibətlərinin uğurla inkişaf etdiyi vurğulanıb. İkitərəfli əməkdaşlığın müxtəlif istiqamətlərdə genişlənməsindən məmnunluq ifadə olunub.
Münasibətlərin möhkəmləndirilməsində Azərbaycan və BƏƏ prezidentləri arasında mövcud olan şəxsi dostluq əlaqələrinin, qarşılıqlı səfərlərin və görüşlərin mühüm rol oynadığı qeyd edilib.
BƏƏ-dən böyük nümayəndə heyətinin Azərbaycana səfərinin əməkdaşlıqla bağlı məsələlərin müzakirəsi baxımından əhəmiyyəti də vurğulanıb.
Daha sonra Prezident İlham Əliyevin və Şeyx Tahnun bin Zayed Al Nəhyanın iştirakı ilə bir sıra mühüm sənədlərin imzalanması mərasimi keçirilib.
Mərasimdə bərpaolunan enerji, investisiya, Naxçıvanda mineral-xammal potensialının qiymətləndirilməsi və kəşfiyyatı, data mərkəzi və süni intellekt infrastrukturu, “Cənub Qaz Dəhlizi” və Neftçalada 315 MVt gücündə günəş elektrik stansiyası layihəsi ilə bağlı saziş və anlaşmalar imzalanıb.
İmzalanan sənədlər Azərbaycan ilə BƏƏ arasında enerji, investisiya, mədənçilik, yüksək texnologiyalar və digər strateji sahələrdə əməkdaşlığın daha da genişləndirilməsinə yönəlib.
