Azərbaycan Respublikasının Prezidenti İlham Əliyev iyunun 18-də Ərəb Koordinasiya Qrupuna daxil olan üzv qurumların rəhbər şəxslərindən ibarət nümayəndə heyətini qəbul edib.

Görüşdə çıxış edən dövlət başçısı nümayəndə heyətinin İslam İnkişaf Bankı Qrupunun 2026-cı il üzrə İllik Toplantılarında iştirakının əhəmiyyətini vurğulayıb. Prezident İlham Əliyev Azərbaycanla Ərəb Koordinasiya Qrupuna daxil olan qurumlar arasında səmərəli əməkdaşlığın mövcud olduğunu, bir sıra layihələrin artıq icra mərhələsində olduğunu bildirib.

Nümayəndə heyəti adından çıxış edən İslam İnkişaf Bankı Qrupunun sədri Məhəmməd Süleyman Əl-Casir qəbula görə təşəkkürünü ifadə edib. O, Azərbaycanla rəhbərlik etdiyi qurum arasında əməkdaşlığın inkişafına göstərilən dəstəyi yüksək qiymətləndirib.

Görüş zamanı tərəflər arasında tərəfdaşlığın daha da genişləndirilməsi, Azərbaycandakı əlverişli investisiya mühitinin birgə layihələrin həyata keçirilməsi baxımından yaratdığı imkanlar müzakirə olunub.

Daha sonra Prezident İlham Əliyevin iştirakı ilə "Sumqayıt Yeni Tullantı Sutəmizləyici Qurğunun tikintisi" layihəsi üzrə Kredit sazişi imzalanıb. Həmçinin Azərbaycan Respublikasının İqtisadiyyat Nazirliyi, Azərbaycan Dövlət Su Ehtiyatları Agentliyi və Ərəb Koordinasiya Qrupu üzvləri arasında Abşeron yarımadasında 33 yaşayış məntəqəsinin su təchizatı və kanalizasiya sistemlərinin tikintisi layihəsi üzrə əməkdaşlığın genişləndirilməsinə dair Anlaşma Memorandumu mübadilə olunub.

Tədbirin sonunda dövlət başçısı İslam İnkişaf Bankı Qrupunun sədri Məhəmməd Süleyman Əl-Casirə "Dostluq" ordenini təqdim edib. Orden ona Azərbaycan ilə İslam İnkişaf Bankı arasında əməkdaşlığın inkişafına verdiyi töhfələrə görə verilib.

Məhəmməd Süleyman Əl-Casir göstərilən yüksək etimada görə Prezident İlham Əliyevə minnətdarlığını bildirib.