Azərbaycan Milli QHT Forumu məktəblərdə şagird və müəllimlərin geyim qaydaları ətrafında aparılan müzakirələrə münasibət bildirib.
Forum bəyanatında son günlər İran və digər xarici ölkələrin internet resurslarında Azərbaycanın dünyəvi dövlətçilik modelini hədəf alan və məktəblərdə geyim qaydaları məsələsini dini qarşıdurma müstəvisinə çıxarmağa yönəlmiş informasiya kampaniyalarının müşahidə olunduğu vurğulanıb.
Təşkilat Azərbaycanın dünyəvilik prinsipinin tarixi dövlətçilik ənənəsi və milli sərvəti olduğunu qeyd edərək, dini inanclardan siyasi məqsədlərlə istifadə edilməsini, cəmiyyətdə süni qarşıdurma yaradılmasına yönələn çağırışları pisləyib.
Bəyanatda bildirilib ki, Azərbaycan xalqı dini-mənəvi dəyərlərinə ehtiramla yanaşı, müxtəlif dinlərin nümayəndələrinin sülh və qarşılıqlı hörmət şəraitində yaşadığı tolerantlıq ənənələri ilə də seçilir. Forumun mövqeyinə görə, dini dəyərlərin qorunması ilə dünyəvi dövlətçilik prinsiplərinə sadiqlik bir-birinə zidd deyil, əksinə, cəmiyyətin birgəyaşayış mədəniyyətinin mühüm tərkib hissələridir.
Məktəblərdə geyim qaydalarına toxunan Forum qeyd edib ki, təhsil müəssisələrində müəyyən edilmiş tələblərin tətbiqi qanunvericiliyə uyğun, ardıcıl, şəffaf və bütün şagirdlər üçün bərabər şəkildə həyata keçirilməlidir. Bildirilib ki, bu qaydalar dini dəyərlərə qarşı yönəlmiş addım kimi deyil, təhsil mühitinin hüquqi çərçivəsinin və dünyəvi xarakterinin qorunması kontekstində qiymətləndirilməlidir.
Bəyanatda məktəblərin elmin, təhsilin, azad düşüncənin və milli-mənəvi dəyərlərin inkişaf etdiyi məkanlar olduğu vurğulanıb. Həmçinin dini həssaslıqlardan istifadə edərək cəmiyyətdə parçalanma yaratmağa yönələn informasiya kampaniyalarına qarşı ayıq-sayıq olmağın vacibliyi diqqətə çatdırılıb.
Azərbaycan Milli QHT Forumu vətəndaş cəmiyyəti nümayəndələrini, ziyalıları, müəllimləri, valideynləri, media subyektlərini və ictimaiyyəti məsələyə emosional yanaşmalardan uzaq durmağa, Konstitusiya, qanunvericilik və milli maraqları əsas götürməyə çağırıb.
Bəyanatda vurğulanıb ki, qanunun aliliyi, milli həmrəylik və dünyəvilik Azərbaycanın dövlətçilik əsaslarının mühüm dayaqlarıdır və bu dəyərlərin qorunması ümumi vətəndaş məsuliyyətidir.
