Prezident İlham Əliyev Türk Dövlətləri Təşkilatına (TDT) üzv dövlətlərin əqli mülkiyyət qurumları rəhbərlərinin 2-ci Görüşünün iştirakçılarına müraciət ünvanlayıb.
QanunTV.az xəbər verir ki, müraciətin mətnini President.az yayıb.
Dövlət başçısı müraciətində iştirakçıları Bakıda keçirilən görüş münasibətilə salamlayıb, Azərbaycanın Türk Dövlətləri Təşkilatının institusional gücünün artırılması, beynəlxalq nüfuzunun möhkəmləndirilməsi və türk dünyasının birliyinin daha da gücləndirilməsi istiqamətində həyata keçirdiyi fəaliyyətə diqqət çəkib.
Prezident qeyd edib ki, zəngin elmi və mədəni irsə, böyük insan kapitalına və artan innovasiya potensialına malik türk dünyası əqli mülkiyyət sahəsində əməkdaşlığın genişləndirilməsi üçün mühüm imkanlara sahibdir. Bu baxımdan, müvafiq qurumların rəhbərlərinin mütəmadi görüşlərinin keçirilməsi əhəmiyyətli addım kimi qiymətləndirilib. Ötən il Bişkekdə təşkil olunan ilk görüşün bu istiqamətdə mühüm başlanğıc olduğu vurğulanıb.
Müraciətdə süni intellektin, rəqəmsallaşmanın və yeni texnologiyaların sürətli inkişafının əqli mülkiyyət sistemləri qarşısında yeni vəzifələr yaratdığı bildirilib. İlham Əliyev texnoloji tərəqqinin imkanlarından səmərəli istifadə etməklə yanaşı, müəlliflərin və ixtiraçıların hüquqlarının qorunmasının, innovasiyaların təşviqinin və cəmiyyətin maraqları arasında tarazlığın təmin edilməsinin vacibliyini qeyd edib.
Dövlət başçısı Azərbaycanda rəqəmsal transformasiyanın sürətləndirilməsi və süni intellektin tətbiqinin genişləndirilməsi istiqamətində elmi tədqiqatların və ixtisaslı kadr potensialının gücləndirilməsi üçün ardıcıl tədbirlərin həyata keçirildiyini diqqətə çatdırıb.
Prezident, həmçinin türk xalqlarının ortaq mədəni irsinin qorunmasının, onun mənimsənilməsi və təhrif edilməsinin qarşısının alınmasının birgə fəaliyyətin əsas istiqamətlərindən biri olmalı olduğunu vurğulayıb. Bildirilib ki, Azərbaycanda əqli mülkiyyət hüququnun əsasları ulu öndər Heydər Əliyevin təşəbbüsü ilə qoyulub və sonrakı illərdə bu sahə daha da təkmilləşdirilib.
İlham Əliyev əminliyini ifadə edib ki, Bakı görüşündə aparılacaq müzakirələr və irəli sürüləcək təşəbbüslər əqli mülkiyyət institutları arasında əməkdaşlığın yeni mərhələyə yüksəlməsinə, eləcə də türk dünyasının qlobal rəqabət qabiliyyətinin artırılmasına töhfə verəcək.
Dövlət başçısı tədbirin işinə uğurlar arzulayıb.
