Azərbaycan Respublikasının Prezidenti İlham Əliyev Azərbaycanın yəhudi icmasına Roş ha-Şana bayramı münasibətilə təbrik məktubu ünvanlayıb.

Qanuntv.az xəbər verir ki, dövlət başçısı məktubunda yəhudi icmasının nümayəndələrini əlamətdar bayram münasibətilə səmimi-qəlbdən təbrik edib, onlara ən xoş arzularını çatdırıb.

Prezident İlham Əliyev qeyd edib ki, Azərbaycan tarixən müxtəlif sivilizasiyaların qovuşduğu məkan olub. Ölkədə müxtəlif xalqların və dini inancların nümayəndələri arasında qarşılıqlı hörmət, etimad, dostluq və qardaşlığa əsaslanan nümunəvi münasibətlər formalaşıb.

Məktubda vurğulanıb ki, müasir Azərbaycanda insanların dilindən, dinindən və etnik mənsubiyyətindən asılı olmayaraq fundamental hüquq və azadlıqlarının təmin edilməsi üçün demokratik-hüquqi şərait yaradılıb.

Dövlət başçısı bildirib ki, Azərbaycanda əsrlər boyu formalaşmış etnik-dini tolerantlıq mühitində yəhudi icması öz milli-mənəvi dəyərlərini, dilini və mədəniyyətini qoruyub saxlayaraq ölkənin sosial-mədəni həyatında fəal iştirak edir və vətəndaş həmrəyliyinin möhkəmlənməsinə öz töhfəsini verir.

Prezident İlham Əliyev Roş ha-Şananın yeniliyin, mənəvi saflığın, xeyirxahlıq və həmrəyliyin rəmzi olduğunu qeyd edərək, yəhudi icmasının hər bir nümayəndəsinə və ailələrinə xoşbəxtlik, firavanlıq və bərəkət arzulayıb.

“Bayramınız mübarək olsun!” – deyə dövlət başçısı təbrikini yekunlaşdırıb.