Bakı və Əbu-Dabi şəhərləri arasında qardaşlaşma münasibətlərinin yaradılması haqqında Anlaşma Memorandumu imzalanıb.

Məlumata görə, sənəd fevralın 11-də Birləşmiş Ərəb Əmirliklərinin nümayəndə heyətinin Bakıya səfəri çərçivəsində imzalanıb. Nümayəndə heyətinə Əbu-Dabinin Bələdiyyələr və Nəqliyyat Departamentinin sədri Məhəmməd Əli Əl-Şorafa rəhbərlik edib.

Memorandum BƏƏ nümayəndə heyətinin Bakı Şəhər İcra Hakimiyyətinin başçısı Eldar Əzizovla görüşü zamanı imzalanıb. Görüşdə iki ölkə arasında yüksək səviyyəli dostluq və əməkdaşlıq münasibətlərinin mövcud olduğu vurğulanıb.

Sənəd Bakı və Əbu-Dabi arasında rəsmi qardaş şəhər münasibətlərinin qurulmasını nəzərdə tutur və iki paytaxt arasında əməkdaşlığın genişlənməsinə xidmət edir.

Qeyd edək ki, Bakı və Əbu-Dabi şəhərlərinin qardaşlaşması məsələsi daha əvvəl Azərbaycan Prezidenti İlham Əliyevin BƏƏ-yə səfəri zamanı müzakirə olunmuşdu.