Qanuntv.az xəbər verir ki, 2016-cı ilin aprel döyüşləri zamanı Azərbaycan hərbçilərinin göstərdiyi şücaət və döyüş əzmi düşməni vahiməyə salmışdı.
Ehtiyatda olan gizir Ziya Təhməzov və qazi çavuş Rövşən Quliyev APA-nın çəkiliş qrupuna müsahibəsində həmin döyüşlərdə yaşadıqları anları xatırlayıblar.
Çavuş Rövşən Quliyev Talış kəndi ətrafındakı yüksəkliklərdə döyüşməkdən qürur duyduğunu bildirib:
"İndi bu torpaqlarda gəzmək mənim üçün böyük qürur hissidir. Əks-hücum əmri verilən zaman düşmənin müqavimətinə baxmayaraq, erməni silahlı birləşmələrinin müdafiə səddini yararaq strateji yüksəkliklər istiqamətində irəlilədik. 44 günlük Vətən müharibəsində 2016-cı ildə nəzarətə götürdüyümüz yüksəkliklərdən əməliyyatlara başladıq və torpaqlarımızı işğaldan azad etdik. Bu döyüşlərdə iştirak etdiyim üçün fəxr edirəm."
Ehtiyatda olan gizir Ziya Təhməzov isə tank əleyhinə bölmədə döyüşdüyünü və əks-hücum əmri zamanı şəxsi heyətin yüksək ruh yüksəkliyi göstərdiyini qeyd edib:
"Döyüş yoldaşlarımızla birlikdə düşmənin xeyli sayda zirehli texnikasını, tanklarını, PDM-lərini və şəxsi heyət daşıyan avtomobillərini məhv etdik. Talış istiqamətində gedən döyüşlərdə şəxsi heyətin əzmi və dəqiq atəşi düşməni vahiməyə salmışdı. Həmin anlarda yeganə məqsədimiz torpaqları geri almaq idi. Allah bütün şəhidlərimizə rəhmət eləsin."
Qeyd edək ki, 2016-cı ilin aprelində Azərbaycan Ordusunun həyata keçirdiyi əməliyyat nəticəsində Talış kəndi ətrafındakı hakim yüksəkliklər azad edilib. Bununla düşmənin Goranboy və Tərtər istiqamətindəki yaşayış məntəqələrini atəş altında saxlaması dayandırılıb. Eyni zamanda Füzuli-Cəbrayıl istiqamətində aparılan əməliyyatlar nəticəsində strateji Lələtəpə yüksəkliyi azad edilərək Füzuli rayonunun Horadiz qəsəbəsi və Cəbrayıl rayonunun Cocuq Mərcanlı kəndi atəş altından xilas edilib.
Aprel döyüşləri həmçinin Azərbaycan əsgərinin mənəvi-psixoloji üstünlüyünü nümayiş etdirib və yeni döyüş taktikalarının tətbiqi ilə hərb tariximizdə mühüm yer tutur. Bu döyüşlər 44 günlük Vətən müharibəsinə aparan yolun ən mühüm mərhələlərindən biri kimi tarixdə qalıb.
