İtaliyanın Baş naziri Corcia Meloni Azərbaycan Prezidenti İlham Əliyevə hökumət başçısı vəzifəsində ən uzun müddət fəaliyyət göstərməsi münasibətilə göndərdiyi təbrikə görə təşəkkür edib.

Qanuntv.az xəbər verir ki, Meloni bu barədə “X” sosial şəbəkə hesabında paylaşım edib.

İtaliya hökumətinin başçısı Azərbaycan Prezidentinə müraciətində iki ölkə və xalqları arasında mövcud olan səmimi dostluq münasibətlərini yüksək qiymətləndirib.

“Əziz Prezident İlham Əliyev, bu sözlərə və xalqlarımızı birləşdirən səmimi dostluğa görə təşəkkür edirəm”, – deyə Meloni bildirib.

Baş nazir qeyd edib ki, son illər ərzində İtaliya və Azərbaycan ortaq baxış və maraqlara əsaslanan möhkəm əməkdaşlıq əlaqələri qurub.

“Strateji tərəfdaşlığımızın möhkəmləndirilməsi istiqamətində birlikdə gördüyümüz işlə çox fəxr edirəm və əminəm ki, qarşıda bizi xalqlarımızın maraqları naminə yeni mühüm əməkdaşlıq imkanları gözləyir”, – deyə Corcia Meloni vurğulayıb.