2023-cü il sentyabrın 20-də, saat 13:00-da Qarabağdakı separatçı rejim silahı yerə qoyduğunu və döyüş əməliyyatlarını dayandırdığını elan edib.
QanunTV.az xatırladır ki, Vətən müharibəsindən sonra Qarabağ bölgəsində davam edən separatçı fəaliyyətlər Azərbaycanın öz ərazilərində dövlət suverenliyini tam bərpa etməsi məqsədilə lokal xarakterli antiterror tədbirlərinin keçirilməsini zəruri edib.
2023-cü il sentyabrın 19-da saat 13 radələrində Azərbaycan Ordusu antiterror tədbirlərinə başlayıb. Müdafiə Nazirliyinin məlumatına görə, əməliyyat çərçivəsində Ermənistan silahlı qüvvələrinin birləşmələrinin ön xətt və dərinlikdə yerləşən mövqeləri, uzunmüddətli atəş nöqtələri, döyüş vasitələri və hərbi təyinatlı obyektləri yüksək dəqiqlikli zərbələrlə sıradan çıxarılıb.
Gecə saatlarında Müdafiə Nazirliyi antiterror tədbirlərinin keçirildiyi ərazidə silahların yerə qoyulması ilə bağlı çağırış edib. Lakin döyüş əməliyyatları sentyabrın 20-də də davam etdirilib.
Həmin gün Prezident İlham Əliyev ABŞ-nin o zamankı dövlət katibi Antoni Blinkenlə telefon danışığı zamanı əməliyyatların dayandırılması şərtlərini açıqlayıb.
“Silahın yerə qoyulduğu və tərk-silah olunduğu halda antiterror tədbirləri dayandırılacaq”, – deyə dövlət başçısı bildirib.
Qeyd olunub ki, Azərbaycan Prezidentinin Administrasiyası Qarabağda yaşayan erməni sakinlərin nümayəndələrini reinteqrasiya məsələlərinin müzakirəsi üçün dəfələrlə dialoqa dəvət edib. Əvvəlki dəvətlər qəbul edilməsə də, antiterror tədbirləri zamanı növbəti dəfə dialoq təklifi irəli sürülüb.
Nəhayət, 2023-cü il sentyabrın 20-də saat 13:00-da Qarabağın erməni sakinlərinin müraciəti nəzərə alınaraq lokal xarakterli antiterror tədbirlərinin dayandırılması barədə razılıq əldə olunub.
Razılaşmanın şərtlərinə əsasən:
1. Qarabağda yerləşən Ermənistan silahlı qüvvələrinin birləşmələri və qeyri-qanuni erməni silahlı dəstələri silahı yerə qoymalı, döyüş mövqelərindən və hərbi postlardan çıxmalı, tam şəkildə tərksilah olunmalı idi. Ermənistan silahlı qüvvələrinin birləşmələrinin Azərbaycan ərazilərini tərk etməsi, qeyri-qanuni silahlı dəstələrin buraxılması nəzərdə tutulurdu.
2. Bütün silah-sursat və ağır texnika təhvil verilməli idi.
3. Prosesin Rusiya sülhməramlı kontingenti ilə əlaqələndirilmiş şəkildə həyata keçirilməsi təmin edilməli idi.
Həmin gün Prezident İlham Əliyev xalqa müraciət edərək antiterror tədbirlərinin başa çatdığını və Azərbaycanın dövlət suverenliyinin bərpa edildiyini elan edib.
