Milli Məclis “Gender bərabərliyinin təmin edilməsinə nəzarəti həyata keçirən icra hakimiyyəti orqanının 2025-ci ildə fəaliyyəti haqqında məlumat”ı qəbul edib.
Qanuntv.az xəbər verir ki, hesabat parlamentin bugünkü plenar iclasında müzakirəyə çıxarılıb və Ailə, Qadın və Uşaq Problemləri üzrə Dövlət Komitəsinin sədri Bahar Muradova tərəfindən təqdim olunub.
Məlumatda qeyd edilib ki, Azərbaycanda 2025-ci ilin 1 iyulunadək 1 412 qohum nikahı faktı qeydə alınıb. Bu rəqəm 2024-cü ildə 2 058 olub.
Bildirilib ki, 2025-ci ildə ölkədə 48 546 nikaha daxilolma, 20 675 boşanma qeydə alınıb. Ötən illə müqayisədə nikahların sayı azalıb, hər min nəfərə düşən göstərici 4.9-dan 4.7-yə enib. Boşanmaların səviyyəsi də 2.1-dən 2-yə düşüb.
Ən çox boşanma halları Qarabağ (1 590), Abşeron-Xızı (1 504), Mərkəzi Aran (1 442) və Gəncə-Daşkəsən (1 374) iqtisadi rayonlarında qeydə alınıb. Ən az göstəricilər isə Dağlıq Şirvan (577) və Şərqi Zəngəzur (711) bölgələrində olub.
Hesabata əsasən, aliment öhdəliklərindən yayınan 2 344 nəfər inzibati qaydada həbs edilib, ümumilikdə 3 083 protokol üzrə tədbir görülüb. Bundan əlavə, 235 cinayət işi başlanılıb.
Erkən evlilik və qızqaçırma hallarına qarşı görülən tədbirlər nəticəsində 90 erkən evlilik cəhdinin qarşısı alınıb, 15 qızqaçırma faktı üzrə cinayət işi açılıb.
Məişət zorakılığı ilə bağlı isə Ailə, Qadın və Uşaq Problemləri üzrə Dövlət Komitəsinə 558 müraciət daxil olub. Zorakılıq hallarında zərərçəkənlərin əksəriyyətini qadınlar və uşaqlar təşkil edib.
Hesabat müzakirələrdən sonra səsverməyə çıxarılaraq bir oxunuşda qəbul edilib.
