Bu gün Azərbaycan Hərbi Hava Qüvvələrinin "MiQ-29" döyüş təyyarəsinin pilotu, polkovnik-leytenant Rəşad Atakişiyevin şəhid olmasının yeddi ili tamam olur.
Qanuntv.az xatırladır ki, Rəşad Saləddin oğlu Atakişiyev 7 yanvar 1985-ci ildə Şəmkir rayonunun Qılıncbəyli kəndində anadan olub. Orta təhsilini yüksək nəticələrlə başa vurduqdan sonra 2002-ci ildə Azərbaycan Ali Hərbi Təyyarəçilik Məktəbinə daxil olub və 2006-cı ildə uçuş mühəndisi ixtisası üzrə məzun olaraq hərbi pilot kimi xidmətə başlayıb.
Peşəkar hazırlığı və yüksək bacarığı sayəsində qısa müddətdə polkovnik-leytenant rütbəsinə yüksələn Rəşad Atakişiyev Azərbaycan Hərbi Hava Qüvvələrinin təcrübəli pilotlarından biri kimi tanınıb. O, Azərbaycan Ordusunun 100 illiyi münasibətilə keçirilən hərbi paradda, "Şahinlər" filmində nümayiş etdirilən mürəkkəb uçuş manevrlərində, eləcə də Azərbaycan və Türkiyə Hərbi Hava Qüvvələrinin "TurAz Qartalı" birgə taktiki-uçuş təlimlərində iştirak edib.
2019-cu il iyulun 24-də gecə təlim-məşq uçuşu zamanı pilotun idarə etdiyi "MiQ-29" təyyarəsi ilə rabitə qəfil kəsilib və təyyarə radarlardan itib. Sonradan məlum olub ki, döyüş təyyarəsi Xəzər dənizinə düşüb.
Pilotun və təyyarənin axtarışlarına Azərbaycanla yanaşı, Türkiyə və Rusiyadan mütəxəssislər və xüsusi texniki vasitələr cəlb edilib. Avqustun 19-da təyyarənin "qara qutusu", avqustun 20-də isə Rəşad Atakişiyevin nəşi tapılıb. O, avqustun 21-də II Fəxri xiyabanda dəfn edilib.
Azərbaycan Respublikası Prezidentinin müvafiq qərarı ilə 7 may 2021-ci ildə polkovnik-leytenant Rəşad Atakişiyevə şəhid statusu verilib.
Qeyd edək ki, şəhid pilot ailəli idi. Ondan Vətənə əmanət iki övladı yadigar qalıb. Allah rəhmət eləsin.
