Binə qəsəbəsində idarəçilik narazılıqları artır — sakinlər illərdir həllini tapmayan problemlərdən şikayətçidirlər
Müəllif: Bəxtiyar Vəliyev
(Qanuntv.az – Təsisçi və Baş redaktor)
Xəzər rayon Binə qəsəbəsinin icra nümayəndəsi Əlisoy Ərastun Ağəddin oğlu uzun müddətdir bu vəzifədə çalışsa da, qəsəbə sakinləri gündəlik həyatda qarşılaşdıqları problemlərin həll olunmamasından ciddi narazılıq edirlər. Qanuntv.az-a daxil olan çoxsaylı şikayətlərə əsaslanaraq, qəsəbədə bir sıra sosial və kommunal məsələlərin uzun müddət diqqətsiz qaldığı görünür.
Yolların bərbad vəziyyəti: Yağış yağanda qəsəbə keçilməz olur
Sakinlərin sözlərinə görə, xüsusən yağışlı havalarda Binənin bir çox küçə və məhəllələrini su basır. Qəsəbədə yağış sularının axını üçün normal drenaj sisteminin olmaması insanlar üçün həm gediş-gəlişi çətinləşdirir, həm də nəqliyyatın hərəkətini iflic edir.
Sakinlər bildirib ki, dəfələrlə icra nümayəndəliyinə müraciət etsələr də, problemin həlli istiqamətində real addımlar atılmayıb.
Binə Sovxoz ərazisində zibil məsələsi narazılıq yaradıb
Qəsəbənin Sovxoz adlanan hissəsində yaşayan sakinlər zibil tullantılarının uzun müddət daşınmaması və əraziyə kifayət qədər zibil qutularının qoyulmaması səbəbindən böyük narahatlıq yaşayır.
Müraciətlərə baxmayaraq, yeni zibil konteynerlərinin quraşdırılmaması nəticəsində məhəllələrdə pis qoxu, antisanitariya yaranır. Bu isə həm ekoloji, həm də sağlamlıq baxımından risk yaradır.
Sakinlər: “Problemlər illərdir yığılır, amma həll olunmur”
Şikayətçilər bildirirlər ki, idarəçilikdə biganəlik və reaksiya zəifliyi geniş narazılıq doğurur. Onlar ümid edirlər ki, bu kimi məsələlər diqqətə alınacaq, ictimai idarəetmədə açıq dialoq və real iş prinsipi gücləndiriləcək.
Qanuntv.az məsələnin araşdırılmasını davam etdirəcək
Redaksiyamız sakinlərin narazılıqlarını aidiyyəti qurumlara çatdırmaqda davam edəcək. İcra nümayəndəsindən də məsələ ilə bağlı mövqe öyrənməyə çalışırıq. Rəsmi cavab daxil olduqda yayımlanacaq.
