Avqustun 23-də Azərbaycan Respublikasının birinci xanımı Mehriban Əliyeva və qızı Leyla Əliyeva Özbəkistan Respublikasının birinci xanımı Ziroatxon Mirziyoyeva, qızları Saida və Şaxnoza Mirziyoyevalar ilə birlikdə Daşkənddə “Oxunguzar” incəsənət məkanını ziyarət ediblər.
QanunTV xəbər verir ki, “Oxunguzar” layihəsi Özbəkistan Respublikasının Prezident Administrasiyası yanında Mədəniyyət və İncəsənətin İnkişafı Fondunun sifarişi ilə həyata keçirilib.
İncəsənət məkanında Özbəkistanın zəngin milli-mədəni irsini əks etdirən müxtəlif sənət nümunələri nümayiş olunur. Burada keramika, tikiş, zərgərlik məmulatları, eləcə də ağac üzərində oyma sənətinin nümunələrinin təqdim edildiyi sərgilər təşkil edilir.
Məkanda, həmçinin müxtəlif görüşlər, mühazirələr və maarifləndirici tədbirlər keçirilir.
Ziyarət zamanı qonaqlar “Oxunguzar” incəsənət məkanında yaradılmış şərait və burada həyata keçirilən layihələrlə tanış olublar.
Mehriban Əliyeva və Leyla Əliyevanın Ziroatxon Mirziyoyeva və qızları ilə birlikdə bu mədəniyyət məkanını ziyarət etməsi Azərbaycan və Özbəkistan arasında mədəni-humanitar əlaqələrin inkişafına verilən qarşılıqlı əhəmiyyətin göstəricisi kimi diqqət çəkir.
Azərbaycan və Özbəkistan arasında tarixi və mədəni yaxınlığa əsaslanan münasibətlər son illərdə daha da genişlənib. Qarşılıqlı mədəni layihələr və bu kimi təşəbbüslər iki xalq arasında mövcud dostluq və qardaşlıq bağlarının daha da möhkəmlənməsinə xidmət edir.
